Kanadaning yangi bosh vaziri Mark Karni o‘z mamlakati hech qachon Qo‘shma Shtatlar tarkibiga kirmasligini yana bir bor ta’kidladi. Bu haqda u qasamyod qabul qilish marosimida aytib o‘tdi, deb xabar bermoqda The Globe and Mail nashri.
“Biz hech qachon, hech qanday sharoitda Qo‘shma Shtatlarning bir qismi bo‘lmaymiz. Kanada Amerika emas”, dedi Karni. “Biz tubdan boshqa mamlakatmiz”, deya qo‘shimcha qildi u.
Mark Karni 2025-yil yanvarida iste’foga chiqishini e’lon qilgan Jastin Tryudo o‘rniga bosh vazir bo‘ldi. Jastin Tryudo siyosiy harakat unga o‘rinbosar topishi bilanoq vazifasini tark etishini aytgandi.
Jastin Tryudo 2013-yildan beri partiyaga rahbarlik qilib kelgan, 2015-yilda esa bosh vazir lavozimini egallagandi.
Mark Karni Donald Tramp tomonidan importga 25 foizlik bojxona to‘lovlari kiritilishi va AQSH prezidentining Kanada suverenitetiga daxl qilishi sharoitida AQSH bilan savdoda qaramlikni kamaytirish maqsadida Yevropa va Osiyo bilan yaqin hamkorlik tarafdori.
Bundan tashqari, u o‘rta sinf uchun soliqlarni kamaytirish, byurokratiyani qisqartirish va innovatsiyalar va investitsiyalarni faol rag‘batlantirishni o‘z ichiga olgan fundamental iqtisodiy islohotlarni amalga oshirishni va’da qilmoqda.
Izoh (0)