Канада бош вазири Жастин Трюдо 8 январь куни бўлиб ўтадиган миллий йиғилишга қадар либераллар партияси раҳбари лавозимидан истеъфога чиқади. Бу ҳақда Globo хабар берди.
Жастин Трюдо 6 январь, душанба куниёқ Либерал партия етакчиси лавозимидан кетишини эълон қилиши мумкин. Манбалар Трюдо қачон кетишини аниқ билмайди.
Аммо бу чоршанба куни бўлиб ўтадиган муҳим миллий мажлисдан олдин содир бўлиши кутилмоқда, дейилади хабарда.
Трюдо ўз истеъфосини Либерал партия фракцияси билан учрашувдан олдин эълон қилиши керак, акс ҳолда унинг истеъфосини партия аъзолари мажбурий қарор сифатида қабул қилиши мумкин. Трюдо Канада бош вазири бўладиган партиянинг янги раҳбари сайлангунга қадар ҳукуматни бошқаришда давом этадими, ҳозирча номаълум.
Сўровлар шуни кўрсатмоқдаки, Трюдо раҳбарлик қилаётган Либерал партия бу йил ўтказилиши керак бўлган сайловларда консерваторларга мағлуб бўлади. Шундай рейтинглар шароитида тобора кўпроқ либерал парламент аъзолари Трюдони истеъфога чиқишга очиқ чақирмоқда.
Декабрь ойидаги сўровномаларга кўра, Пер Пуаевр бошчилигидаги консерваторлар 44 фоиз овоз олмоқда, Трюдонинг Либерал партияси эса атиги 21 фоиз овозга эга.
Сўнгги йилларда ҳукумат раҳбарининг обрўси пасайиб бормоқда. Трюдони иқтисодий қийинчиликларни бартараф этишга қодир эмаслиги учун танқид қилишмоқда: бюджет тақчиллиги ўсиши шароитида бош вазир ижтимоий харажатларни оширишни таклиф қилгани нафақат жамиятда, балки ўз партияси аъзолари орасида ҳам норозилик уйғотди. Декабрь ойида молия вазири Христя Фриланд лавозимидан кетди ва кейинчалик Трюдони “сиёсий манипуляциялар”да айблади.
Бундан ташқари, Трюдо ҳукумати нархларнинг кўтарилиши, уй-жой бозоридаги танглик ва самарасиз миграция сиёсати учун ҳам жавобгар деб ҳисобланмоқда.
Трамп бир неча бор Канадага таҳдид қилганди
АҚШнинг сайланган президенти Мексика ва Канада товарларига 25 фоизлик, Хитойникига эса 10 фоизлик бож жорий этишини айтганди. Қарор ноқонуний мигрантлар оқими ва гиёҳванд моддалар контрабандаси билан боғлиқ. Трамп тегишли баёнотни Канада бош вазири Жастин Тюдо билан суҳбатда ҳам айтганди. У агар тегишли чора кўрилмаса, Канада АҚШнинг 51-штати, Трюдо эса унинг губернатори бўлишини таъкидлаган. Шунингдек, Канада Қўшма Штатларга қўшиб олинган тақдирда, мамлакатдаги солиқлар 60 фоиздан кўпроққа пасайишини билдирган.
Изоҳ (0)