Италия ҳукумати G7 ташқи ишлар вазирларининг Фюже шаҳрида бўлиб ўтган йиғилишида Исроил бош вазири Биньямин Нетаньяхуни ҳибсга олиш учун Халқаро жиноят суди (ХЖС) ордери масаласида муросага келишга ҳаракат қилмоқда. Бу ҳақда Il Messaggero газетаси хабар қилди.
Рим Яқин Шарқдаги можаро тугамагунча буйруқ ижросини тўхтатишни таклиф қилди.
Рим статутини ратификация қилган давлатлар ХЖС буйруғини бажариши шарт. Il Messaggero ёзганидек, Италия ХЖС қарорига ҳурмат кўрсатишга интилади, аммо Яқин Шарқ можаросини ҳал қилиш учун Биньямин Нетаньяху билан мулоқот қилиш зарурлигини таъкидламоқда, шунинг учун ордер масаласи кейинга қолдирилиши керак, деб ҳисоблайди.
“Еттилик гуруҳи”га (G7 — Group of seven) Буюк Британия, Германия, Италия, Канада, АҚШ, Франция, Япония киради. Биньямин Нетаньяхуни ҳибсга олиш ордери юзасидан ассоциация давлатларининг позицияси бошқача. Қўшма Штатлар ХЖС юрисдикциясини тан олмайди ва шу билан бирга суд қарорини қоралаб, Исроилни қўллаб-қувватлайди. Европа иттифоқи, ўз навбатида, буйруқни бажаришга мажбур, деб эслатди Европа дипломатияси раҳбари Жозеп Боррел.
Буюк Британия, Франция, Германия ва Канада ХЖС қарорини эътиборсиз қолдириб бўлмайди, деб эълон қилди. Италия ташқи ишлар вазири ва бош вазир ўринбосари Антонио Таяни суднинг позициясини нотўғри деб атади, чунки прокурорлар шу билан “7 октябрдаги қирғинни уюштирган одамни демократик йўл билан сайланган бош вазирга тенглаштирган”.
Антонио Таяни шериклари билан бир қарорга келиш учун ХЖС ҳужжатларини ўрганишга ваъда берди.
ХЖС 21 ноябрь куни Биньямин Нетаньяху ва собиқ мудофаа вазири Йоав Галантни ҳибсга олишга ордер берди. Тергов уларнинг Ғазо секторидаги тинч аҳолини яшаш учун зарур бўлган сув, дори-дармон, озиқ-овқат, тиббий жиҳозлар, ёқилғи ва электр энергиясидан “қасддан маҳрум қилган” деб ҳисоблади. Ил Мессаггеро ёзишича, шу сабабли бугунги кунда Биньямин Нетаньяху Европага саёҳат қилишдан тийилмоқда.
Европа дипломатияси раҳбари Жозеп Боррел халқаро жиноят судининг Нетаньяхуни ҳибсга олиш бўйича қарори ижро этилиши шартлигини таъкидлаган.
Изоҳ (0)