Канада бош вазири Жастин Трюдо Украина президенти Владимир Зеленскийнинг ташрифи чоғида СС фахрийси Ярослав Гункани парламент йиғилишига таклиф қилгани учун мамлакат номидан узр сўради.
“Бу парламент ва Канадани қаттиқ шарманда қилган хато бўлди. Жамоатлар палатасида бўлган барчамиз ўрнимиздан туриб қарсак чалганимиздан чуқур афсусдамиз, биз контекстни тушунмай шундай қилдик”, — дея Трюдонинг сўзларидан иқтибос келтирган Канада ОАВ.
Канада бош вазири бу воқеа Холокост пайтида ҳалок бўлган миллионлаб одамлар хотирасига қарши ҳурматсизлик эканини айтди. У Канада парламентида СС фахрийсини шарафлаш яҳудийлар, поляклар ва Иккинчи жаҳон уруши пайтида нацистлар режими томонидан нишонга олинган бошқа гуруҳлар учун “жуда оғриқли” эканини тан олди.
Трюдонинг таъкидлашича, Канада Гункани олқишлаётгани суратга олинган Зеленскийдан ҳам кечирим сўрайди, суратлар россиялик пропагандистлар томонидан турлича талқин қилинганди. Бош вазирнинг таъкидлашича, воқеага жавобгар — ҳозир истеъфога чиққан Жамоатлар палатаси спикери Энтони Рота.
“Энг катта дипломатик шармандалик”
CBC News хабарига кўра, Консерватив партия етакчиси Пьер Поилевр парламентдаги воқеани мамлакат тарихидаги “энг катта дипломатик шармандалик” деб атаганидан кейин бош вазир узр сўраб чиқди. Нашр манбаларининг қайд этишича, Трюдо парламент аъзоларидан бўлиб ўтган воқеа ҳақида матбуот билан гаплашмасликни сўраган.
Владимир Зеленскийнинг 22-сентябр куни Канадага ташрифи чоғида Жамоатлар палатаси спикери Энтони Рота 98 ёшли Ярослав Гункани парламент йиғилишига таклиф қилди. У “Украина мустақиллиги учун ва русларга қарши курашган украин-канадалик Иккинчи жаҳон уруши фахрийси” сифатида таништирилди. Гунка олқишлар билан кутиб олинди.
Кейинчалик маълум бўлишича, Гунка яҳудийларнинг оммавий қотиллиги ва геноциди билан шуғулланган фашистлар бўлинмаси — 14-Ваффен-СС гренадор дивизиясида (Галисия дивизияси сифатида ҳам танилган) хизмат қилган.
Воқеа яҳудий ташкилотлари, Польша, Россия ва Германия вакиллари ҳамда Канада мухолифати томонидан танқид қилинди. 25-сентябр куни Рота бўлиб ўтган ишлардан афсусда эканини айтди ва кечирим сўради. Эртаси куни у истеъфога чиқди.
Изоҳ (0)