Россия президенти Владимир Путин Александр Дарчиевни АҚШга элчи этиб тайинлади. АҚШ ҳам Москвадаги ишончли вакилини ўзгартирмоқда. Бу ҳақда “Коммерсант” хабар берди.
Тайинловга қадар Дарчиев Россия Ташқи ишлар вазирлигининг Шимолий Атлантика департаменти директори вазифасини бажарган. 2017 йилдан 2024 йилгача Россиянинг АҚШдаги элчиси Анатолий Антонов бўлган. Ўтган йилнинг кузидан бери бу лавозим бўш эди. Янги элчиси 64 ёшда бўлиб, Венгрияда туғилган.
У Москва давлат университетини тамомлаган, тарих фанлари номзоди илмий даражасини олиш учун диссертациясини ҳимоя қилган. Дипломатик фаолиятини Россия Ташқи ишлар вазирлигининг Шимолий Америка департаментида бошлаган, у ерда турли йилларда бўлим бошлиғи, директор ўринбосари ва департамент директори лавозимларида фаолият юритган.
АҚШ ва Канада институтининг илмий ходими, Россиянинг АҚШдаги элчихонаси маслаҳатчиси, Россиянинг Канададаги элчиси бўлган. 2021 йил январидан Россия Ташқи ишлар вазирлигининг Шимолий Атлантика департаментини бошқарган.
АҚШнинг Москвадаги вакили лавозимига эса Ливия бўйича махсус вакил Ричард Норланд раҳбарлик қилиши белгиланди. Унга қадар АҚШнинг Россиядаги элчиси лавозимини Линн Трейси эгаллаб турган эди.
Россия Ташқи ишлар вазирлигига кўра, 27 февраль куни Истанбулда икки давлат делегациялари ўртасида йиғилиш бўлиб ўтган. Унда томонлар Александр Дарчиевни АҚШга элчи этиб тайинлаш тўғрисида нота имзоланган. 18 февраль куни эса Ар-Риёдда Россия-АҚШ музокаралари бўлиб ўтди. Россия Ташқи ишлар вазири Сергей Лавров учрашувда ўзаро янги элчилар тайинлаш масаласида келишувга эришилганини айтди.
Изоҳ (0)