Kanadada sobiq Markaziy bank rahbari Mark Karni Liberal partiyaning yangi rahbari lavozimiga o‘tkazilgan saylovda g‘alaba qozondi.
U 9-mart kuni o‘tkazilgan saylovning dastlabki hisob-kitobi natijalariga ko‘ra 85 foizdan ortiq ovoz to‘plab, sobiq moliya vaziri Xristya Friland, Liberal partiya a’zosi Karina Guld va biznesmen Frenk Beylisni ortda qoldirdi.
Mark Karni 2025-yil yanvarida iste'foga chiqishini e’lon qilgan Jastin Tryudo o‘rniga bosh vazir bo‘ladi. Jastin Tryudo siyosiy harakat unga o‘rinbosar topishi bilanoq vazifasini tark etishini aytgandi.
Jastin Tryudo 2013-yildan beri partiyaga rahbarlik qilib kelgan, 2015-yilda esa bosh vazir lavozimini egallagandi.
Mark Karni Donald Tramp tomonidan importga 25 foizlik bojxona to‘lovlari kiritilishi va AQSH prezidentining Kanada suverenitetiga daxl qilishi sharoitida AQSH bilan savdoda qaramlikni kamaytirish maqsadida Yevropa va Osiyo bilan yaqin hamkorlik tarafdori.
Bundan tashqari, u o‘rta sinf uchun soliqlarni kamaytirish, byurokratiyani qisqartirish va innovatsiyalar va investitsiyalarni faol rag‘batlantirishni o‘z ichiga olgan fundamental iqtisodiy islohotlarni amalga oshirishni va’da qilmoqda.
Izoh (0)