Мексика президенти Клаудия Шейнбаум якшанба куни минглаб одамлар тўпланган митингда сўзга чиқиб, АҚШни ўзаро ҳурмат ва мулоқотни давом эттиришга даъват этди.
Шейнбаумнинг чиқиши АҚШ президенти Дональд Трамп Мексика товарларига қўшимча 25 фоизлик божхона тўловларини жорий этишни бир ойга кечиктиргандан сўнг бўлиб ўтди.
Пойтахт Мехико шаҳридаги Сокало майдонида ўтказилган митингда президент Мексиканинг АҚШ билан муносабатларни ўзаро ҳурмат ва ҳамкорлик асосида мустаҳкамлаш ниятида эканлигини билдирган.
"Биз Мексика ва АҚШ ўртасидаги муносабатлар доимо ўзаро ҳурмат ва мулоқот орқали мустаҳкамланиб боришига ишонамиз. Америка халқига шуни айтмоқчиманки, бизда уларга зарар етказиш нияти йўқ ва ҳеч қачон бўлмайди. Биз улар билан барча соҳаларда ҳамкорлик қилишга қатъий азм қилганмиз," деди Шейнбаум
Президент, шунингдек, Мексика ёшлар орасида фентанил тарқалишининг олдини олиш бўйича АҚШ билан ҳамкорликни давом эттиришини таъкидлаган.
"Биз бу гиёҳванд модда нафақат АҚШ ёшларига, балки бошқа мамлакатлар, жумладан, Мексика ёшларига ҳам етиб боришини истамаймиз," дея қўшимча қилган у.
Шейнбаум сўнгги 30 йил ичида Мексика ва АҚШ иккита савдо битимини имзолаганини эслатди. У Мексиканинг мақсади нафақат Шимолий Америка, балки бутун қитъанинг иқтисодий интеграцияси эканлигини қайд этган.
Шунингдек, икки давлат ўртасидаги 3180 километрлик чегара ҳақида ҳам сўз юритиб, Мексика ва АҚШ ўртасидаги савдо, иқтисодий ва маданий алоқаларнинг муҳимлигини билдирган.
1 февраль куни АҚШ президенти Дональд Трамп Канада, Хитой ва Мексикадан келтирилаётган товарларга божхона тўловларини жорий этишни назарда тутувчи фармонни имзолаганди. У мазкур қарорини ноқонуний мигрантлар ва гиёҳванд моддалар контрабандаси таҳдиди билан изоҳлаганди.
Бунга жавобан Клаудия Шейнбаум Мексика томонидан жавоб тарзида шунга ўхшаш ва яна бир қатор чораларни кўрилишини билдирганди.
6 март куни АҚШ президенти Дональд Трамп 2020 йилги савдо келишуви доирасида Мексика ва Канада товарларига нисбатан 25 фоизлик божларни тўхтатиб қўйишини айтганди.
Изоҳ (0)