Украина қуролли кучлари Россиянинг турли ҳудудларига, жумладан, Москвага қарши энг йирик дрон ҳужумини амалга оширди. Россия Мудофаа вазирлиги ҳисоботига кўра, 11 мартга ўтар кечаси Россия бўйлаб жами 337 та украин дрони уриб туширилган.
Москва мери Сергей Собяниннинг маълум қилишича, маҳаллий вақт билан, тахминан, 4:30 дан 7:00 гача шаҳар яқинида 74 та дрон уриб туширилган. Домодедоводаги “Мираторг” дистрибютор марказининг қўриқчиси дрон қолдиқлари тушиши натижасида ҳалок бўлди. Дрон автомашиналар турар жойига қулаган ва ёнғин чиқиб, 20 та автомобиль ёниб кетган. Ходим машина яқинида бўлган. Бундан ташқари, Видное ва Домодедоводаги ҳужумлар оқибатида уч киши жароҳат олди.
Подмоскове губернатори Андрей Воробёвнинг сўзларига кўра, Раменскоедаги кўп қаватли уйга дрон қолдиқлари тушиб, 19-дан 22-қаватгача бўлган камида етти хонадон зарар кўрган. У ердан 12 киши, жумладан, 3 нафар бола эвакуация қилинган.
Домодедово станциясида дрон қолдиқлари темир йўл инфратузилмасига ҳам зарар етказган. Қурбонлар йўқ, лекин таъмирлаш ишлари олиб борилмоқда ва Москвага поездлар ҳаракати кечикмоқда.
Жуковский ва Домодедово аэропортларида эса “ковёр” режими жорий қилинган, бу парвозлар учун вақтинчалик чекловларни англатади.
Шот нашрининг маълумотларига кўра, ҳужумда ПД-2, “Рубака” ва “Лютйй” туридаги дронлар қўлланган. Улар Черниҳив, Сумй ва Днепропетровск вилоятларидан учирилган бўлиб, 6–12 та дронли гуруҳларда ҳаракатланган. Бу усул орқали ҳаво ҳужумидан мудофаа тизимларини чалғитиш мақсад қилинган.
Бунгача Москвага энг йирик дрон ҳужуми 2023 йил 10 ноябрда бўлиб ўтган эди, ўшанда 32 та дрон уриб туширилган.
Россия Мудофаа вазирлиги ҳисоботига кўра, 11 март куни кечаси Россия бўйлаб жами 337 та украин дрони уриб туширилган, бу 2022 йил февралдан бери рекорд ҳисобланади. Хусусан:
- Москва вилояти – 91 та,
- Курск – 126 та,
- Брянск – 38 та,
- Белгород – 25 та,
- Рязань – 22 та,
- Калуга – 10 та,
- Липецк ва Орел – 8 тадан,
- Воронеж – 6 та,
- Нижегород вилояти – 3 та дрон уриб туширилган.
15 декабрь куни Чеченистон пойтахти Грозний шаҳрида дронлар ҳужуми кузатилган эди. Рамзан Қодиров учта дрон ҳужум қилгани, уларнинг иккитаси уриб туширилганини тасдиқлаган эди.
Ғарбий Украинага ҳужум
13 декабрь куни Украинанинг ғарбий ҳудудлари кенг кўламли уруш бошланганидан бери Россия армиясининг энг оммавий ҳужумига дучор бўлди. Украина президенти Владимир Зеленскийнинг аниқлик киритишича, биргина 13 декабрга ўтар кечаси Россия армияси Украинага қарата 93 та ракета, жумладан қанотли ва баллистик ракеталар, шунингдек, 200 га яқин дронлар учирган.
Изоҳ (0)