Украина президенти Владимир Зеленский Американинг CBS телеканали журналисти билан суҳбатда Россиядаги нишонларга қилинган ҳужумлар ҳақидаги саволга жавоб берди. Ҳозирча Украина расмийлари ҳужумдаги иштирокини расман тан олмаган.
Зеленский Украина билан чегарадан юзлаб километр узоқликдаги нишонларга, жумладан, Москва марказига ҳужум қилган дронлар ортида Украина кучлари тургани ҳақидаги даъволарни бевосита рад этмади. У фақат Украина Ғарб иттифоқчилари берган қуроллардан ўз ҳудудида фойдаланишини такрорлади.
Шу билан бирга, Украина президенти “Россия Украинага ҳужум учун ракеталарни қаердан учирмасин, Украина ўша жойга ҳужум қилишга маънан ҳақли” эканини таъкидлади.
“Биз уларга шундай жавоб берамиз: Осмонингиз сиз ўйлаганчалик яхши ҳимояланмаган”, — деди Украина раҳбари
Зеленский ўз интервьюсида Украинанинг қарши ҳужуми суръатига ҳам изоҳ берди.
“Бу қийин вазият, сизга очиқ гапираман. Биздаги ташаббуснинг ўзи плюс. Бу жуда муҳим. Рус босқинчиларининг юришини тўхтатиб, ҳужумга ўтилди. Шунга қарамай, ҳаракат унчалик тез эмас. Аммо биз учун ҳар куни олдинга силжиётганимиз муҳим”, — деди у.
Украина президентининг таъкидлашича, украин қўшинлари ҳатто юз метр бўлса ҳам, имкон қадар олдинга силжиши керак.
“Путиннинг тин олишига йўл қўймалсигимиз керак”, — деди Зеленский.
У, шунингдек, Украина Қуролли кучларининг ҳужуми об-ҳавога боғлиқ эмаслигига ишонтирди: ҳозирда баъзи Ғарб таҳлилчилари яқин орада кузги лойгарчилик бошланиши ҳақида хавотир билан огоҳлантирмоқда.
Украина қўмондонлиги аннексия қилинган Қримдаги нишонларга, жумладан, Қрим кўпригига қилинган ҳужумларни расман тан олган. Шу билан бирга, Украина Мудофаа вазирлигининг Бош разведка бошқармасидаги манбалар Россия ҳарбий аэродромларига айнан разведка хизмати ҳужум уюштирганини айтган. Ҳужум оқибатида Украина ҳудудини ўққа тутишда қатнашган самолётларга шикаст етган.
Изоҳ (0)