Франция қуролли кучлари вазири Себастьян Лекорню мамлакат Украинага 195 миллион евролик қурол юборишини айтди. Бу маблағлар музлатилган Россия активларидан олинган даромадлар ҳисобидан ажратилади. Бу ҳақда La Tribune Dimanche хабар берди.
Лекорнюнинг айтишича, маблағ 155 миллиметр калибрли снарядлар ва Mirage 2000 қирувчи самолётлари учун ААSМ бошқариладиган бомбаларни етказиб беришга йўналтирилади. Вазир Украинага эски ҳарбий техникани, жумладан, АМХ-10RC танклари ва VAB зирҳли машиналарини топширишни тезлаштиришни ваъда қилди.
2022 йил февралдан буён Ғарб мамлакатларида Россиянинг тахминан 300 миллиард евроси музлатиб қўйилган. Уларнинг 200 миллиард еврогача бўлган қисми дунёдаги энг йирик ҳисоб-китоб ва клиринг тизимларидан бири ҳисобланган Бельгиянинг Euroclear компанияси ҳисобварақларида сақланмоқда.
Франция Европа иттифоқи давлатларига Россиянинг музлатилган активларидан Украина хавфсизлик кафолатларини таъминлаш учун фойдаланишни таклиф қилган. Режага кўра, агар Россия тинчлик келишувини бузса, ушбу активлар мусодара қилинади. Москва эса блокланган активларни қайтаришни талаб қилмоқда ва уларнинг ўзидан ёки улардан олинадиган даромаддан фойдаланишни ўғрилик деб ҳисобламоқда.
Буни фақат ноқонуний ният сифатида қабул қиламиз. Агар бу режани амалга оширишга ҳаракат қилинса, у жуда жиддий суд ва ҳуқуқий оқибатларга олиб келади, деган Россия президенти матбуот котиби Дмитрий Песков.
Изоҳ (0)