Бельгия 2026 йилда Киевни 1 миллиард евролик қурол-яроғ билан таъминлашга ваъда бермоқда. Ушбу ёрдам пакетига F-16 самолётларини етказиб бериш ҳам кириши таъкидланмоқда.
Бу ҳақда Бельгия мудофаа вазири Тео Франкен Европа иттифоқининг Украина бўйича фавқулодда саммити якунлари бўйича VRТ телеканалига берган интервьюсида маълум қилди.
“Бельгия четда қараб турмайди ва 1 миллиард евролик қурол-аслаҳа беради. Шу жумладан, Чехия артиллерия ташаббуси доирасида артиллерия снарядларини харид қилиш учун 216 миллион евро, Германия ташаббуси доирасида ҳаво ҳужумидан мудофаа тизимлари учун 200 миллион евро ажратиш, шунингдек, Бельгия F-16 самолётларини етказиб бериш кўзда тутилган”, деди Франкен.
Олдинроқ саммит арафасида Бельгия бош вазири Барт Де Вевер Бельгия эндиликда ҳарбий самолётларни Киевга етказиб бериш ниятида эканини айтган эди.
Аввалроқ Туркия зарурат туғилганда Украинага қўшин юборишга тайёрлиги маълум қилинган.
“Миссияга ҳисса қўшиш масаласи, агар у минтақавий барқарорлик ва тинчлик ўрнатиш учун зарур деб топилса, кўриб чиқилади ва барча тегишли томонлар билан ўзаро баҳоланади”, деган Анқарадаги манба Reuters агентлиги билан суҳбатда.
Изоҳ (0)