Миллиардер ва АҚШ ҳукуматининг самарадорлик департаменти (DOGE) раҳбари Илон Маск Украинадаги урушни тўхтатишга қаратилган бир қатор таклифлар берди. Бу ҳақда у Х (собиқ Twitter) саҳифасида ёзди.
Таклифлардан бири “Украина армиясининг асоси” бўлган Starlink сунъий йўлдош интернет тизимини ўчириш ҳисобланади. Маск тизимнинг ўчирилиши Украина қуролли кучлари фронт чизиғининг инқирозига олиб келишини айтмоқда. Ҳозирда Украина бўлинмалари жанговар ҳаракатлар зонасида алоқа учун Starlink’дан фойдаланмоқда. Бундан ташқари, миллиардер украиналик олигархларга санкциялар жорий қилишга чақирмоқда.
Украинанинг энг йирик ўн нафар олигархига, айниқса, Монакода қасрлари бўлганларга қарши санкциялар киритинг ва уруш дарҳол тўхтатилади. Мана жумбоқнинг калити, деган Маск.
Тадбиркор айнан қайси олигархларга нисбатан чекловлар жорий этилиши кераклигига аниқлик киритмаган. 2021 йилда АҚШ украиналик тадбиркор Игор Коломойский ва унинг оиласига қарши санкциялар киритди. Коломойский 2014—2015 йилларда Украинанинг Днепропетровск вилояти губернатори сифатида коррупцияда айбланган.
Бундан ташқари, Washington Mail манбаларига кўра, 2025 йил февраль ойида АҚШ Одесса мэри Геннадий Трухановга қарши санкциялар жорий этиш имкониятини кўриб чиқаётган эди. Америка томонининг фикрича, мэр Одесса жиноий гуруҳи билан алоқадор, шунингдек, тўртта оффшор компаниянинг катта улушига эга.
Изоҳ (0)