АҚШнинг амалдаги раҳбари Жо Байден Мудофаа вазирлигига Украинага қурол-яроғ етказиб беришни тезлаштиришни топширганини айтди. Бу ҳақда Оқ уй хабар берди.
Байденнинг баёноти 25 декабрь куни Москва Украинанинг энергетика тизимига оммавий зарбалар йўллагани фонида эълон қилинди.
Россия Рождествонинг дастлабки соатларида Украина шаҳарлари ва ўта муҳим энергетика инфратузилмасига ракета ва дронлар билан зарбалар берди. Ушбу ҳужумдан мақсад Украина халқини қишда иссиқлик ва электр энергиясидан маҳрум қилиш ва энергетика тизими хавфсизлигига таҳдид солишдан иборат.
Украина халқи тинчлик ва хавфсизликда яшашга муносиб, ва АҚШ халқаро ҳамжамият билан биргаликда Россия тажовузи устидан ғалаба қозонгунига қадар Украинани қўллаб-қувватлашни давом эттириши лозим, дейилади Байденнинг Оқ уй томонидан эълон қилинган баёнотида.
У сўнгги ойларда АҚШ Украинага ҳаво ҳужумидан ҳимояланиш учун юзлаб ракеталар етказиб берганини ва яна кўпчилиги йўлда эканини эслатди.
Мен Мудофаа вазирлигига Украинага қурол-яроғ етказиб беришни тезлаштириш бўйича ишларни давом эттиришни топширдим, ва АҚШ Украинанинг Россия қўшинларига қарши мудофаа ҳолатини мустаҳкамлаш устида тинмай меҳнат қилади, деди у.
Россиянинг Украинага ҳужуми
25 декабрь куни Россия Украина энергетика тизими ҳамда шаҳарларига қанотли ва баллистик ракеталар, шунингдек, дронлар билан ҳужум қилди. Украина ҳудудлари раҳбарларига кўра, зарбалар натижасида Харьковда камида олти киши яраланган ва Днепропетровск вилоятида бир киши ҳалок бўлган.
Харьков вилоятида ярим миллион аҳоли қиш шароитида, ҳарорат нолдан бир неча даража юқори бўлган пайтда иссиқлик таъминотисиз қолди. Киев ва бошқа шаҳарларда электр таъминоти вақтинча тўхтатилди.
“Путин атайлаб ҳужум учун Рождество байрамини танлади. Бундан ҳам инсонийликка зид нарса бўлиши мумкинми? 70 дан ортиқ ракета, жумладан баллистик ракеталар ва юздан ортиқ зарба берувчи дронлар. Уларнинг нишони энергетика инфратузилмамиз ҳисобланади”, деди Зеленский.
АҚШ ҳарбий ёрдамига Россиянинг позицияси
Россия Украинага қурол-яроғ етказиб бериш муаммони ҳал этишга тўсқинлик қилиши, НАТО давлатларини тўғридан-тўғри можарога жалб этиши ва “олов билан ўйнашиш” эканини билдирган. Россия ташқи ишлар вазири Сергей Лавров Украина учун қурол-яроғ ташиётган ҳар қандай юк Россия учун қонуний нишонга айланишини таъкидлаган.
Унинг сўзларига кўра, АҚШ ва НАТО нафақат қурол етказиб бериш, балки Буюк Британия, Германия, Италия ва бошқа давлатлар ҳудудида кадрлар тайёрлаш орқали ҳам можарода бевосита иштирок этмоқда. Кремль эса Ғарбнинг Украинани қурол билан таъминлаши салбий оқибатларга олиб келишини билдирган. Россия таҳдидли баёнотларига қарамай, ўзи ҳам Шимолий Корея ҳарбийларини урушга жалб қилмоқда, жанг майдонида Эроннинг Shahed дронларидан фойдаланмоқда.
Изоҳ (0)