Украина ҳарбийлари ёки разведка хизматлари май ойи бошида Кремлга қилинган дрон ҳужумига алоқадор бўлиши мумкин, деб ҳисоблайди АҚШ разведкаси. Бу ҳақда The New York Times (NYT) исмини ошкор этмаган америкалик расмийларга таяниб хабар берди.
АҚШ разведкаси Украина ва Россия томонининг тутиб олинган хабарлар тўлқини асосида шундай хулосага келган. NYT манбаларига кўра, ҳужумда Украина махсус хизматларининг иштироки ҳақида аниқ далиллар йўқ.
АҚШ разведкаси ҳужум ортида ким тургани, Украина президенти Владимир Зеленский ва бошқа украиналик амалдорлар ҳужумдан хабардор бўлган-бўлмагани ҳақида аниқ айта олмайди. Америкалик расмийларнинг фикрича, дрон ҳужуми Украина назоратисиз амалга оширилаётган ва АҚШни безовта қилаётган қатор операцияларнинг бир қисми бўлиши мумкин.
3 май куни Кремлга учувчисиз учоқлардан ҳужум қилингани акс этган видео тарқалди. Ҳодисада ҳеч ким жабрланмади, бинога жиддий зарар етмади. Россия ҳукумати буни террорчилик ҳаракати ва Россия президентининг ҳаётига суиқасд сифатида баҳолади. Украина расмийлари бунга алоқадорлигини рад этмоқда.
Россия президенти матбуот котиби Дмитрий Песков Кремлга учирилган дронлар ҳужуми ортида АҚШ турганини айтди. Оқ уй эса ҳужумга алоқадорлик бўйича Россия айбловларини “беъмани” деб баҳолади.
Изоҳ (0)