Россия махсус кучлари Курск вилоятида Украина бўлинмаларига орқа томондан зарба бериш учун газ қувурлари ичида ҳаракатланмоқда. Ҳарбийлар шу йўл билан Киев эгаллаб олган бир қанча чегара вилоятларини қайтариб олмоқчи. Бу ҳақда Associated Press хабар берди.
Украина август ойида Россиянинг Курск вилоятига трансчегаравий бостириб киришни бошлаган. Бу Иккинчи жаҳон урушидан бери Россия ҳудудига қилинган энг йирик ҳужум ҳисобланади. Бир неча кун ичида Украина бўлинмалари 1000 квадрат километр ҳудудни, шу жумладан, стратегик чегарадаги Сужа шаҳрини эгаллаб олди ва юзлаб рус ҳарбий асирларини олиб кетди.
Киевга кўра, операция келажакда тинчлик музокараларига эришиш ва Россияни Украина шарқидаги шафқатсиз ҳужумларидан чалғитиш мақсадида амалга оширилган. Ҳозирда Украинанинг 10 минглаб аскари Россия ва унинг иттифоқчиси бўлган Шимолий Кореянинг 50 мингдан ортиқ ҳарбийлари қуршовида қолмоқда.
Асли украиналик, кремлпараст блогернинг ёзишича, россиялик оперативлар илгари Россия Европага газ етказиб бериш учун фойдаланган қувур ичида тахминан 15 километр (9 мил) масофани босиб ўтган. Блогер Юрий Подоляк таъкидлашича, рус қўшинларининг бир қисми Сужа шаҳри яқинида Украина бўлинмаларига орқа томондан ҳужум қилишдан олдин бир неча кун давомида қувурда яширинган.
Бу ерда қувур бўйлаб йирик газ узатиш ва ўлчаш станциялари жойлашган бўлиб, улар бир пайтлар Россия табиий газини Украина ҳудуди орқали экспорт қилишнинг асосий йўналиши ҳисобланган.
Two Majors тахаллусини қўллайдиган яна бир ҳарбий блогер Сужа учун шиддатли жанглар кетаётгани, рус қўшинлари шаҳарга газ қувури орқали киришга муваффақ бўлганини айтган. Украина бош штаби 8 март куни кечқурун Россиянинг “диверсия ва ҳужум гуруҳлари” Сужа ташқарисида мустаҳкам ўрин эгаллаш учун қувурдан фойдаланганини тасдиқлади.
Россия қўшинлари “ўз вақтида аниқлангани”, Украина уларга ракета ва артиллерия билан жавоб бергани айтилмоқда.
Ҳозирда Россия махсус кучлари аниқланиб, ҳаракатланиши тўсиб қўйилиб, улар йўқ қилинмоқда. Душманнинг Сужадаги йўқотишлари жуда юқори, дейилади бош штабнинг расмий хабарида.
Курскка ҳужум
Изоҳ (0)