Ўзбекистон фуқаролари Россияда уй-жой сотиб олувчи норезидентлар бўйича топ учликка кирди. Бу ҳақда “Известия” хабар берди.
Кўчмас мулк бозори бўйича инвестицион компания — “Флип” раҳбари Евгений Шавневнинг маълум қилишича, 2024 йил сентябридан буён норезидентларнинг уй-жой сотиб олиши бўйича битимлар сони ортиб бормоқда.
“Айни пайтда улар ҳиссасига умумий савдонинг 20 фоизи тўғри келади. Шундан 15 фоизи Ўзбекистон фуқаролари, 21 фоизи — Беларусь, 18 фоизи — Қозоғистон, 10 фоизи — Тожикистон, 10 фоизи — Туркманистон, 2 фоизи — Хитой фуқаролари”, деган у.
Норезидентлар, асосан, Москва (65 фоиз), Санкт-Петербург (10 фоиз) ва Москва вилояти (15 фоиз) ва Россиянинг бошқа ҳудудларидан (10 фоиз) уй-жой сотиб олишга қизиқиш билдирмоқда.
Қайд этилишича, улар нақд пулга бизнес ёки комфорт-плюс тоифали уй-жой мажмуасидан квартиралар сотиб олмоқда. 70 фоиз ҳолатда уйлар инвестиция сифатида эмас, бир йилдан беш йилгача яшаш мақсадида сотиб олинади.
Энг қиммат квартираларни кўпроқ Хитой, Қозоғистон ва Украина фуқаролари сотиб олмоқда. Уларнинг тўлов қобилияти Россия фуқароларига қараганда бир мунча юқори.
Савдоларда харидорларнинг бюджети
- 65 фоиз ҳолатда — 20 миллион рублгача,
- 21 фоиз ҳолатда — 20 миллиондан 50 миллион рублгача,
- 14 фоиз ҳолатда — 50 миллион рублдан юқори бўлган.
“Ҳашаматли кўчмас мулкка нисбатан юқори қизиқиш кўпинча уни оддий фуқаролар эмас, балки бизнес эгалари сотиб олишлари билан изоҳланади”, дейди Евгений Шавнев.
Россиядаги кўчмас мулкларни сотиб олишга Ўзбекистон, Қозоғистон, Беларусь ва бошқа МДҲ давлатлари фуқароларининг қизиқиши ортиб бораётганини у иқтисодий алоқалар мустаҳкамланиши, миграция жараёнлари ва Россияда бизнеснинг кенгайиши билан изоҳлади.
Изоҳ (0)