Россия президенти матбуот котиби Дмитрий Песков Кремлга учирилган дронлар ҳужуми ортида АҚШ турганини айтди. Бу ҳақда “Ведомости” хабар берди.
Песковнинг сўзларига кўра, Киев режимининг хатти-ҳаракатлари Вашингтон томонидан буйруқ асосида бажарилади ва Москва буни яхши билади. У Россия томонида мавжуд бўлган маълумотлар дронлар Украина томонидан учирилганидан далолат беришини айтди.
“Киевда ҳам, Вашингтонда ҳам буни рад этишга уринишлар кузатилаётгани, албатта, бемаънилик. Биз яхши биламизки, бундай ҳаракатлар, ‘терактлар’ бўйича қарорлар Киевда эмас, Вашингтонда қабул қилинади. Киев эса берилган топшириқни бажармоқда.
Аслида тегишли мақсадларни кўпинча Киевнинг ўзи эмас, балки Вашингтон белгилаб беради, кейин эса буни Украина амалга оширишга олиб келади. Ҳар сафар ҳам Киевга танлов ҳуқуқ берилмайди. Бу кўпинча океаннинг нариги томонида диктовка қилинади. Биз буни яхши биламиз ва бундан хабардормиз”, — деди Песков.
Путиннинг матбуот котиби Кремлга ҳужум ортида Вашингтон турганига ишонишини икки марта таъкидлади. У Вашингтон можарода бевосита иштирок этиши қанчалик хавфли эканини тушуниши кераклигини қўшимча қилди.
Кремлга дронлар ҳужуми синчковлик билан текширилмоқда, ҳозир бу билан Россия Тергов қўмитаси ва махсус хизматлар шуғулланмоқда, бироқ Песков тергов натижалари қачон бўлишини айтиш қийинлигини билдирди.
Путиннинг ушбу мавзу бўйича алоҳида чиқиши, шунингдек, Хавфсизлик кенгаши йиғилиши ўтказиши режалаштирилмаган. Бироқ одатдагидек 5 май куни Хавфсизлик кенгашининг доимий аъзолари билан тезкор йиғилишда бу мавзу кўтарилиши мумкин.
Песков дронларнинг ҳужумига қандай жавоб бўлиши мумкинлиги ҳақидаги саволга “хилма-хил” деб жавоб берди ва аниқлик киритмади.
“Ҳар қандай ҳолатда ҳам, биз фақат ўйланган, мамлакатимиз манфаатларига мос келадиган мувозанатли қадамлар ҳақида гапиришимиз мумкин”, — деди у.
Шунингдек, Песков дронларнинг қаердан учирилгани тафсилотларини ошкор қилмаган ва буларнинг барчасига ўз вақтида махсус хизматлар ойдинлик киритишини таъкидлаган.
“Бу қандай содир бўлгани мутахассисларимиз учун чуқур таҳлил қилинадиган мавзу. Улар ўз вазифаларини бажаради”, — деди Песков.
Унинг сўзларига кўра, Кремлда хавфсизлик чоралари аллақачон кучайтирилган.
АҚШ айбловларни рад этди
Оқ уй ҳужумга алоқадорлик бўйича Россия айбловларини “беъмани” деб баҳолади. АҚШ Миллий хавфсизлик кенгашининг стратегик алоқалар бўйича координатори Жон Кирби томонидан тегишли баёнот эълон қилинди, дейди CNN.
АҚШ Давлат котиби Энтони Блинкен Кремль хабарининг тўғрилигига шубҳа билдириб, Оқ уй Украинани Россия ҳудудига зарба беришга ундамаётганини таъкидлади.
Путин қароргоҳига ҳужум: Нималар маълум?
3 май куни Кремлга иккита дрон зарба беришга урингани ҳақида хабар берилди.
“Ҳарбий ва махсус хизматлар томонидан радар жанговар тизимларидан фойдаланган ҳолда ўз вақтида кўрилган чоралар натижасида дронлар ишдан чиқарилди”, — дейилади хабарда.
Россия томони бу ҳаракатларни 9 май парад арафасида амалга оширилган террорчилик ҳаракати ва президентга суиқасд сифатида баҳолади. Бироқ Путин ҳужум пайти Кремлда бўлмагани қайд этилди.
Интернетда ҳужум акс этган видеолар ҳам пайдо бўлди. Биринчи дрон президентнинг Кремль қароргоҳи жойлашган Сенат саройи устида портлаган, шундан сўнг бино гумбази қисми ёниб кетган. Иккинчи дроннинг қолдиқлари Кремль ҳудудига тушган.
Россия Тергов қўмитаси террорчилик ҳаракати (Россия Федерацияси Жиноят кодексининг 205-моддаси) бўйича жиноий иш қўзғатган.
Украина расмийлари ва президент Зеленский ҳужумга алоқадорликни рад этди
Зеленскийнинг сўзларига кўра, Украина ўз ҳудудида жанг олиб бормоқда ва ҳудудини Россиядан ҳимоя қилмоқда.
“Биз Путинга ёки Москвага ҳам ҳужум қилмаймиз. Ўз заминимизда жанг қиламиз, қишлоқ ва шаҳарларимизни муҳофаза қиламиз. Бунинг учун ҳам қуролимиз етарли эмас. Шунинг учун қуроллардан бошқа мақсадларда фойдаланмаймиз”, — деган у.
“Бизда Кремлга тунги ҳужумлар ҳақида ҳеч қандай маълумот йўқ. Аммо, президент Зеленский бир неча бор таъкидлаганидек, Украина барча мавжуд куч ва воситаларни ўз ҳудудларини озод қилишга, бошқаларга ҳужум қилмасликка йўналтиради.
Террористик давлат сўзлари ҳайратланарли. Теракт бу Днепр ва Умандаги кириш йўллари ёки Краматорскдаги темирйўл вокзалидаги ракета отишмаси ва бошқа кўплаб фожиалар оқибатида вайрон бўлган уйлардир. Москвада содир бўлган воқеа, шубҳасиз, 9 майгача вазиятнинг кескинлашуви”, — дейди Зеленскийнинг матбуот котиби.
Изоҳ (0)