Америкалик миллиардер Илон Маск Starlink’ни “Украина армиясининг таянчи” деб атади. Унинг фикрича, Украинадаги тизимга кириш ёпилса, Украина қуролли кучларининг бутун фронт чизиғи инқирозга юз тутади.
“Менинг Starlink тизимим Украина армиясининг таянчидир. Агар мен уни ўчириб қўйсам, уларнинг бутун фронт чизиғи инқирозга юз тутади”, деб ёзган Маск.
Ишбилармоннинг қўшимча қилишича, уни “Украина муқаррар равишда ютқазадиган, боши берк кўчага кириб қолган вазиятдаги кўп йиллик қон тўкилиши” бездирган.
“Мен бир неча йиллардан буён давом этаётган қон тўкиш ва Украина учун барибир мағлубият билан тугайдиган бу урушдан нафратланаман. Ҳақиқатан ҳам қайғурадиган, ўйлайдиган ва тушунадиган одам бу қирғинни тўхтатишни истайди”, дея қўшимча қилди Маск.
Маълумот ўрнида, Украина ҳарбий бўлинмалари жанговар зоналарда алоқа қилиш учун Starlink’дан фойдаланади.
Шунингдек, Вашингтон март ойи бошида Киевга ҳарбий ёрдам беришни тўхтатган эди. 22 февраль куни Reuters агентлиги манбаларга таяниб АҚШ Украинанинг Starlink’ка киришини чеклаш имкониятини кўриб чиқаётгани ҳақида хабар берганди. Бироқ Илон Маск бу хабарни ёлғон деб атаган. Шундан сўнг Украина Мудофаа вазирлиги раҳбари Рустем Умеров мамлакатда Starlink’ка альтернатив борлигини айтган.
Изоҳ (0)