Украинанинг биринчи хоними Елена Зеленская Россиянинг 29 декабрь куни навбатдаги йирик ракета ҳужумига муносабат билдирди. Бу ҳақда у Х ижтимоий тармоғидаги саҳифасида ёзди.
Хусусан, президент рафиқаси душман ўқлари остида қолган шаҳарларни санаб ўтди, ярадорлар ва ҳалок бўлганларнинг оила аъзоларига ҳамдардлик билдирди.
“Жуда оғир кеча. Ўнлаб ракеталар ва дронларнинг ҳужуми. Днепрдаги туғуруқхона ва савдо маркази, Киев ва Лвовдаги уйлар зарбага учради. Харьков оммавий ўққа тутилди. Одесса, Запорожье ва бошқа шаҳарларда портлашлар содир бўлди. Ҳалок бўлганлар ва ярадорларнинг оила аъзоларига ҳамдардлик билдираман. Биз биргамиз. Украиналар кучли. Биз чидаймиз”, — деди у.
Россия қўшинлари 29 декабрь куни энг йирик ҳаво ҳужумини амалга оширди. Украина ҳимоячилари душманнинг 158 ҳаво нишонидан 114 тасини йўқ қилди. Ҳужум оқибатида камида 13 киши ҳалок бўлган.
Зеленский муносабати
Украина президенти Владимир Зеленский ҳам оммавий ҳужумга муносабат билдириб, Россия ўзида мавжуд бўлган деярли ҳамма нарса билан зарба берганини маълум қилди.
Унинг арсеналида: “Кинжал”лар, S-300, қанотли ракеталар, дронлар. Стратегик бомбардимончи самолётлар Kh-101/Х-505 учирди, — деди у.
Зеленскийнинг сўзларига кўра, ракета ҳужуми пайтида Россия Украинага 110 га яқин жанговар каллакларни отган, нишонларнинг аксарияти украиналик ҳимоячилар томонидан уриб туширилган.
“Афсуски, ўққа тутиш оқибатида ҳалок бўлганлар ва ярадорлар бор. Барча хизматлар кучайтирилган режимда ишламоқда ва одамларга зарур ёрдам кўрсатилмоқда. Ҳалок бўлганларнинг оила аъзолари ва яқинларига ҳамдардлик, жароҳатланганларга тезроқ соғайиб кетишни тилайман. Биз террорчиларга уларнинг ҳужумлари учун жавоб қайтарамиз. Мамлакатимиз, ҳар бир шаҳар, бутун халқимиз хавфсизлигини таъминлаш учун курашамиз. Россия террори мағлуб бўлиши керак — айнан шундай бўлади”, — дея таъкидлади президент.
Изоҳ (0)