Украина президенти офиси раҳбари Андрей Ермак ўзининг Telegram каналида Россиянинг Украина энергетика инфратузилмасига қилинган ҳужумлар жавобсиз қолмаслигини айтиб таҳдид қилди.
“Энергетика секторимизни йўқ қилиш истаги руслар ва уларнинг инфратузилмаси учун жуда қимматга тушади”, деди Ермак.
У, шунингдек, ҳамкорларни Ғарб қуролларидан фойдаланиб Россия ҳудудига ўқ отишга рухсат беришга чақирган.
26 август куни эрталаб бутун Украина бўйлаб ҳаво ҳужуми ҳақида огоҳлантириш эълон қилинган эди. Портлашлар Киев, Луцк, Кривой Рог, Харьков, Запорожье, Кременчуг, Кропивицкий, Винница, Днепр, Хмелницкий, Ивано-Франкивск вилояти ва Лвовда содир бўлган. Украина бош вазири Денис Шмигалнинг сўзларига кўра, Украинанинг 15 та вилоятидаги энергетика инфратузилмаси объектлари зарар кўрган.
Шу фонда “Укрэнерго” компанияси тизимни барқарорлаштириш учун электр энергиясини фавқулодда узилишлар жадвалларини жорий қилган. Электр узилишлари сабабли Украина ичидаги поездлар ҳаракати ва сув таъминоти муаммоларга дуч келган.
Россия Мудофаа вазирлиги россиялик ҳарбийлар Украинадаги энергетика объектларига йирик зарбалар берганини тасдиқлаган.
Шунингдек, 26 августга ўтар кечаси Россиянинг бир қатор ҳудудлари Украина дронлари томонидан ҳужумга учраган. Мудофаа вазирлиги маълумотларига кўра, улардан тўққизтаси Саратов вилоятида уриб туширилган. У ерда дронлар Саратов ва Энгелсдаги турар жой биноларига урилган, тўрт киши жароҳатланган.
Изоҳ (0)