Россия президенти Владимир Путин Кремлга 3 май куни учирилган дронларга қандай муносабат билдиргани маълум қилинди. Президент матбуот котиби Дмитрий Песков бу ҳақда маълумот берди.
Песков Путининг муносабати ҳақида гапирар экан, Россия раҳбари оғир, экстремал вазиятларда ўзини хотиржам тутиб, аниқ буйруқ беришини билдирди.
“Бундай оғир, экстремал вазиятларда президент ҳар доим хотиржам бўлиб қолади, берган буйруқларида аниқлик акс этади, шунинг учун бу борада ҳеч қандай янгилик юз бергани йўқ”, — деди Песков.
Шунингдек, у Россия Хавфсизлик кенгаши раиси ўринбосари Дмитрий Медведевнинг Украина раҳбарини ўлдиришдан бошқа вариант қолмагани ҳақидаги баёнотига изоҳ беришдан бош тортди. Аммо Песков Кремлга дронлар ҳужуми туфайли Украинадаги “махсус операция” мақсади ва суръати ўзгармаслигини қайд этди.
Путиннинг иш графигига кўра, у 4 май куни Кремлда ишлайди ва у ерда иқтисодий ривожланиш вазири Максим Решетников билан учрашади. Путин дрон ҳужуми юзасидан халқаро алоқаларни режалаштирмаяпти, деди Песков. Навбатдаги халқаро музокаралар Қирғизистон президенти Садир Жапаровнинг 8 май куни бўлиб ўтадиган амалий ташрифидир.
Путин қароргоҳига ҳужум
Украина 3 майга ўтар кечаси Россия президентининг қароргоҳига дронлар билан зарба беришга урингани ҳақида хабар берилди. Иккита дрон Кремлни нишонга олишга қаратилгани, ҳарбийлар ва махсус хизматларнинг ўз вақтида кўрган сҳоралари натижасида қурилмалар ишдан чиқарилгани таъкидланди.
Ҳужум оқибатида Путин жабрланмагани маълум қилинди, Россия президенти ҳодиса пайтида Кремлда бўлмаган. Ҳолат юзасидан Москвада 3 майдан бошлаб дронлар учириш тақиқланди, 9 май паради ўтказилиши режаси эса давом этади.
Зеленский Кремлга учирилган дронларга қандай муносабат билдирди?
Зеленскийнинг сўзларига кўра, Украина ўз ҳудудида жанг олиб бормоқда ва ҳудудини Россиядан ҳимоя қилмоқда.
“Биз Путинга ёки Москвага ҳам ҳужум қилмаймиз. Ўз заминимизда жанг қиламиз, қишлоқ ва шаҳарларимизни муҳофаза қиламиз. Бунинг учун ҳам қуролимиз етарли эмас. Шунинг учун қуроллардан бошқа мақсадларда фойдаланмаймиз”, — деган у.
Изоҳ (0)