Тошкентдаги Ёшлар ижод саройида ўзбек миллий модасининг жозибаси, замонавий тенденциялар ва анъанавий услубларнинг ўзаро уйғунлиги намоён бўлган “Миллий Fashion Show” модалар намойиши бўлиб ўтди.
Тадбир миллий либосларни кенг тарғиб қилиш, ёш дизайнерларни қўллаб-қувватлаш ҳамда халқнинг ўз анъана ва қадриятларига бўлган ҳурматини яна бир бор юксалтириш мақсадида ташкил этилди.
Намойишда нафис ва бетакрор миллий либослар тақдим этилиб, анъанавий безаклар замонавий мода услублари билан уйғунлашган ҳолда мода ихлосмандларига ҳавола қилинди.
Тадбир давомида санъаткорларнинг жонли чиқишлари байрамона руҳ бағишлаб, тадбирга янада кўтаринкилик бахш этди. Шунингдек, миллий ҳунармандлар кўргазмаси ҳам ташкил этилиб, унда республиканинг турли ҳудудларидан келган моҳир усталар томонидан яратилган нафис ҳунармандчилик буюмлари тақдим этилди.
Меҳмонлар миллий зардўзчилик, миллий ўйинчоқлар, оддий металлардан миллий услубда тайёрланган тақинчоқлар, кандакорлик, мисгарлик буюмлари, кулолчилик, заргарлик ва ёғоч ўймакорлиги каби санъат турларининг энг сара намуналари билан яқиндан танишиш имконига эга бўлишди.
Модалар намойиши меҳмонларга замонавий дизайнерлар томонидан тайёрланган эксклюзив миллий коллекциялар, ипак ва атлас матолар жозибаси, нафис кашталар ҳамда миллий моданинг энг янги йўналишлари билан танишиш имконини берди.
Миллий либослар намойишига бағишланган бундай кўргазмалар ёш авлоднинг миллий қадриятларимизга бўлган ҳурматини ошириш, анъаналаримизни асраб-авайлаш ва қадрлашда муҳим аҳамият касб этади.
Шу муносабат билан Ўзбекистон ёшлар иттифоқи ушбу лойиҳани #MilliyLiboslarMilliyGъурур челленжи сифатида давом эттириб, миллий модани кенг оммага тарғиб қилишни мақсад қилган.
Изоҳ (0)