Спортчиларнинг гонорарлари жуда катта эканлигидан хабаримиз бор. Табиийки, уларнинг кўпчилиги ҳашаматли ҳаёт тарзини танлайди. Уларнинг ҳашаматли харидлар ҳам ажабланарли эмас. Лекин шундай ажабтовур харидлар борки, улар ҳаммани ҳайратда қолдира олади.
Гилберт Аренас ва аквариумдаги акулалар
Гилберт Аренас 2000 йилларда NBA’даги энг кўзга кўринган ва истеъдодли баскетболчилардан бири эди. Уч мавсум давомида ўз салоҳиятини намойиш этишга тўғри келган бўлса-да, 2008 йилда “Вашингтон Уизардс” жамоаси билан 111 миллион долларлик 6 йилга мўлжалланган шартнома имзолаган. Бу битим ҳалигача NBA тарихидаги энг омадсиз келишувлардан бири деб ҳисобланади.
Акулаларни аквариумда сақлаш жуда қимматга тушиши мумкин. Тузли сувни алмаштириш учун пул тўлаш, акулаларга озуқа етказиб туриш ва уларга ғамхўрлик қилиш учун одам ёллаш керак. Аренасга бу завқ йилига 80 минг долларга тушган.
Лионель Мессининг кўнгилочар боғи
“Интер Майами” футболчисининг бойлиги 600 миллион долларга баҳоланади ва Лео кўплаб қимматбаҳо активларга эга. Албатта, Мессининг автомобиллари, уйлари ва боғлари бор. Лекин Лео ўзига хос ва ноодатий нарса сотиб олишга қарор қилган.
Мессининг кўнгилочар боғи Хитойда, Нанкин шаҳрида 2020 йилда очилган. Мухлислар футболчининг шон-шуҳрат йўлидаги саёҳатидан реал вақт режимида баҳраманд бўлиши учун яратилган тематик боғдир. Боғ театрлар, голографик технологиялар, виртуал реаллик, меҳмонхоналар, Америка тепаликлари, футбол майдони ва тўғридан-тўғри Шанхайга борадиган тезюрар поезд каби деярли 300 минг квадрат фут майдонни эгаллаган кўнгилочар объектларни ўз ичига олади.
Бу ажойиб паркни яратиш учун 170 миллион доллар атрофида пул сарфланган. Ташкилотчилар бу боғга йилига 4-5 миллион одам ташриф буюриши ва чипта нархи 40 доллар эканини таъкидлаган.
Майк Тайсон ва унинг Бенгал йўлбарслари
Ит ёки мушук боқиш одамлар учун одатий ҳол. Аммо оқ йўлбарсларни боқиш — умуман бошқа масала.
Баъзи манбаларга кўра, Тайсон учта Бенгал йўлбарси учун 140 минг доллар тўлаган ва 125 минг долларга дрессировкачи ёллаган.
Бундан ташқари, йиртқичларни боқиш ҳар бир йўлбарс учун 4000 доллардан тушади. Йўлбарслар суғурта қилинган, бунинг учун бокс афсонаси ойига 2000 доллар тўлайди.
Дешон Стивенсон ва уй банкомати
NBA’да ўзининг 13 йиллик фаолияти давомида Стивенсон 6 та жамоа шарафини ҳимоя қилган ва 10 миллион доллар атрофида пул ишлаб топган.
Аммо у ўз пулларини сарфлаш учун ғайриоддий йўл ўйлаган. Стивенсон ўз пулларини сақлаш учун уларни контейнерга жойлаштирган.
У ўзига банкомат сотиб олган. Миш-мишларга кўра, Стивенсон дўстларига жуда зарур бўлиб қолган пайтларда банкоматдан нақд пул ечиб олишга рухсат берган ва хизмати ҳақи 4-5 долларни ташкил этган. Банкоматда 20 минг доллардан ортиқ пул бўлмаган. Стивенсон эса уни йилига 4-6 марта тўлдириб турган.
Кармело Энтонининг туяси
NBA тарихидаги энг самарадор бомбардирлардан бири, Лос-Анжелес Лейкерс жамоаси ўйинчиси Кармело Энтони 2011 йилда ижтимоий тармоқдаги саҳифасида қуйидаги ёзувни қолдирган: “Ҳаммада уй ҳайвони сифатида ит ва мушуклари бўлса, менда туя бор!”. Ва ўзининг туя билан тушган суратини илова иқлган.
Энтони туяни 25 минг долларга харид қилган. Аммо 160 миллион долларлик бойликка эга бўлган одам учун бир неча минг доллар — ўз шахсий туяси билан вақт ўтказиш имконияти учун жуда арзон нарх.
Флойд Мейвезернинг бриллиант соатлари
Мода ҳақида гап кетганда, Флойд Мейвезер ўзига юқори эътиборни жалб қилиш учун пулни аямайдиган спортчилардан биридир. 15 карра жаҳон чемпиони Jacob & Cо брендининг соатига 18 миллион доллар сарфлаган. Соат оғирлиги 260 карат бўлган бриллиантлар билан безатилган ва жуда ажойиб кўринишга эга.
Ҳашамдор безаклари туфайли бу соат бир неча уйдан кўра қиммат туради. Мейвезернинг ушбу соати дунёдаги энг қиммат соатлар топ-10 лигидан жой олган.
Златан Ибраҳимовичнинг ороли
Собиқ футболчи Златан Ибраҳимович овни жуда яхши кўради. Унинг кўчмас мулклари рўйхатида Стокгольм яқинидаги Давенсо ороли ҳам бор. У Маларен кўлида жойлашган бўлиб, Швецияда катталиги бўйича учинчи ўринда туради, майдони 500 гектарни ташкил этади. Бу оролда ёввойи буғулар ва тўнғизлар яшайди, шуниндек, у ерга балиқ овлаш учун ҳам бориш мумкин.
Златан оролни қанчага харид қилгани ҳақида расмий маълумотлар йўқ. Баъзи манбаларга кўра, оролнинг қиймати 2,5-3 миллион еврони ташкил этади.
Майкл Жорданнинг самолёти
Афсонавий баскетболчи Майкл Жордан самолётларни яхши кўради. Шу сабабли у шахсий рақами N236MJ бўлган Gulfstream IV самолётини сотиб олишга қарор қилган. Бу ерда N — Шимолий Каролина, 23 — унинг баскетболда ўйнаган рақами, 6 — чемпионлик узуклари миқдори, MJ эса исм-шарифининг бош ҳарфлари ҳисобланади.
Майкл бу билан кифояланиб қолмаган, у самолётини янги босқичга олиб чиққан. Жордан уни “Аир Жордан” буцалари дизайнига мос келадиган рангга бўяган. Бундай бўёқларнинг нархи ошкор этилмаган, лекин самолётнинг ўзи 30 миллион долларни ташкил этиши ҳақида маълумотлар мавжуд.
Крис Синглтоннинг лотерея чипталари
“Вашингтон Уизардс” жамоасининг собиқ баскетболчиси Крис Синглтон нафақат Америкада, балки Хитой ва Туркияда ҳам ўйнаган.
2012 йилда Синглтон ўз бойлигини кўпайтиришга қарор қилган ва Mega Millions ўйинида иштирок этиш учун 10 минг долларлик лотерея чипталарини сотиб олган. Ўйиннинг соврин жамғармаси 640 миллион долларни ташкил этарди.
Ҳар қандай ҳолатда ҳам бу сармоя имкониятига нисбатан жуда шубҳали танлов эди. Mega Millions лотереяси қоидаларига кўра, жекпотни ютиб олиш имконияти 302,5 миллиондан бирга тенг эди. Кўплаб чипталар сотиб олинган бўлса-да, уларнинг ҳеч бири омадли бўлмади ва Крисга муваффақаят келтирмади.
Изоҳ (0)