Агар мода ва мусиқа бир-биридан алоҳида мавжуд деб ўйласангиз, адашасиз. Ҳар икки соҳа бир-бири билан чамбарчас боғлиқ бўлиб, буни айнан клиплар, концертлар ва гастроллар тасдиқлайди.
Кети Перрининг либоси
Нархи: 20 минг доллар
Рўйхатни Кети Перрининг 2015 йилда Супер Боwл да чиққан энг қиммат ва ҳашаматли образидан бошлаймиз. Ўша йили у энг катта спорт тадбирининг бош қаҳрамони бўлганлиги сабабли либоси ҳам шунга яраша бўлиши керак эди. Бу борада қўшиқчи Moschino ижодий директори лавозимини эгаллаган Жереми Скоттга мурожаат қилади. Айнан у Перри учун 20 минг долларлик либос яратган.
Элтон Жоннинг смокинги
Нархи: 100 минг доллар
Элтон Жоннинг саҳна қироли ва ҳайратланарли образлар даҳоси эканлиги билан ҳеч ким баҳслашишга журъат эта олмайди. Унинг барча кийимлари энг майда деталларигача ўйланган. Элтон Жоннинг энг машҳур либосларидан бири бу Моцартдан илҳомланилган костюм. 1988 йилда қўшиқчи уни (ва бошқа кўплаб нарсаларни) ўтмиш билан рамзий хайрлашув сифатида кимошди савдосида сотади. Бир оз вақт ўтгач, оқ смокингнинг эгаси уни 100 минг долларга сотиб юборади.
Taylor Свифтнинг кўйлаги
Нархи: 21 минг доллар
Тейлор Свифт ҳам саҳна кўриниши учун ҳеч қачон пулини аямайди. Яқинда қўшиқчи катта гастрол уюштирди, унинг либослари алоҳида эътиборга лойиқдир. Концерт меҳмонлари ва томошабинлари Оскар Де Ла Рентанинг уч минг долларлик костюмини ва икки минг долларлик Роберто Кавалли комбинезонини кўришди. Лекин энг эсда қоларли образ хонанда учун Зуҳаир Мурод модалар уйи томонидан яратилган 21 минглик пушти кўйлак бўлди.
Майкл Жексоннинг курткаси
Нархи: 289 минг доллар
1987 йилда Майкл Жексоннинг биринчи жаҳон гастроли бўлади. Гастрол давомида у 15 мамлакатга саёҳат қилиб, 123 та концерт беришга муваффақ бўлади. Улардан бирида хонанда кумуш деталлари бўлган қора курткада саҳнага чиқади. Йиллар ўтиб, ушбу концерт либоси кимошди савдосида ақл бовар қилмас нархга — 289 минг долларга сотилади.
Майкл Жексоннинг олмос қўлқоплари
Нархи: 350 минг доллар
Кейинги қиммат лот бу — поп қиролининг севимлиси бўлган бриллиант қўлқоп. Афсонага кўра, фақат битта қўлқоп кийиш ғояси Жексоннинг Роберт Абел Ассоcиатес офислари бўйлаб саёҳати пайтида туғилган. Ўша ерда у ўнг қўлига оқ қўлқоп кийган ҳолда фильмни кўздан кечираётган режиссёр Рик Россни кўриб қолади. Мусиқачига бу образ ёқади. Аксессуар эътиборни жалб қилиши кераклиги сабабли Жексон уни безашни сўрайди. Бир неча йил ўтгач, ўша олмос билан безатилган қўлқоп яратилади. Хонанданинг ўлимидан сўнг у кимошди савдосида рекорд даражадаги 350 минг долларга сотилади.
Элвис Преслининг пиджаги
Нархи: 1 миллион доллар
Бироқ энг қиммат саҳна образи Майкл Жексонга эмас, балки Элвис Преслига тегишли. 1972 йилда рок-н-ролл қироли Нью-Йоркдаги Madison Square Gardenъда ҳашаматли оқ комбинезон кийган ҳолда чиқиш қилади. Бу образни дизайнер Билл Белю қўшиқчи учун махсус яратган. Икки йил аввал костюм кимошди савдосида 1 миллион долларга сотилган.
Изоҳ (0)