Чеченистон раҳбари Рамзан Қодировнинг тўнғич қизи Айшат Қодирова ўзининг Instagram саҳифасида республика ҳукумати раиси ўринбосари лавозимини тарк этганини эълон қилди.
У “ушбу вазифа кучли эркак киши учун кўпроқ мос” эканини қайд этди.
Узоқ мулоҳазалардан сўнг Чеченистон Республикаси ҳукумати раисининг ўринбосари лавозимидан кетишга қарор қилдим. Бу иш мен учун муҳим тажриба бўлди, ижтимоий соҳа йўналиши республикамиз ривожланишида катта аҳамиятга эга, деди Айшат Қодирова.
Чеченистон президентининг қизи “бизнес лойиҳаларини амалга ошириб, республика фаровонлиги йўлида меҳнат қилишни” режалаштираётганини қўшимча қилди.
Ишончим комилки, бу фаолият орқали сиёсат билан шуғулланишга қараганда кўпроқ фойда келтира оламан, дейди у.
Шунингдек, Айшат мода соҳасидаги ишига қайтишини ҳам айтиб ўтди.
Қодирова 2023 йил октябрь ойида республика бош вазири ўринбосари лавозимини эгаллаган, бунгача у Чеченистон маданият вазири бўлган. Қизнинг истеъфога чиқиш қарори ҳақида унинг отаси Рамзан Қодиров ҳозирча ҳеч қандай изоҳ бермади.
2022 йил июнь ойида Айшат Қодирова Чеченистоннинг биринчи президенти ордени билан, 2023 йил сентябрида эса “Ватан маданияти ва санъатини ривожлантириш” ва “кўп йиллик самарали ижодий фаолияти” учун иккинчи даражали “Ватан олдидаги хизматлари учун” ордени билан тақдирланган.
Изоҳ (0)