Исроил миллий хавфсизлик вазири Итамар Бен-Гвир бутун Ғазони босиб олишга чақирди. Бу ҳақда The Times of Israel хабар берди.
Вазир бу баёнотни Қуддусдаги Ал-Ақсо масжиди жойлашган Маъбад тоғига кўтарилганида айтган. У ҲАМАСни тезроқ тор-мор қилиш, Ғазо секторини “тўлиқ эгаллаш” ва кейинчалик анклав аҳолисининг “ихтиёрий кўчиб кетиши” учун шароит яратиш тарафдори эканини айтган.
Айнан шу ердан, биз (Исроил) суверенитетини намойиш этган Ибодатхона тоғидан, сигнал юборишимиз лозим: бутун Ғазони эгаллаш, бутун сектор устидан [Исроил] ҳукмронлигини ўрнатиш, ҲАМАСнинг ҳар бир аъзосини йўқ қилиш ва (фаластинликларнинг Ғазодан) ихтиёрий равишда чиқиб кетишига ёрдам бериш керак. Бу гаровга олинганларни қайтариш ва урушда ғалаба қозонишнинг ягона йўлидир, деган вазир видеомурожаатида.
У ушбу мурожаатни Исломнинг асосий муқаддас жойларидан бири бўлган Қоя гумбази олдида туриб ёзиб олган. Бен-Гвир мурожаатидан бир оз олдин Маъбад тоғида яҳудийларнинг ибодат йиғинига қўшилган. Бу Исроил ҳукуматидан биринчи марта амалдаги вазирнинг у ерда очиқ ибодат қилгани бўлди.
Ҳозирги кунда амал қилаётган тартибга кўра, Маъбад тоғида фақат мусулмонлар ибодат қилиши мумкин, бошқа дин вакиллари, шу жумладан, яҳудийлар, у ерга фақат сайёҳ сифатида ташриф буюриши ва диний маросимларни бажармай, зиёрат қилиши лозим.
Изоҳ (0)