Ижро маҳорати, табиий гўзаллиги ва назокати билан кино саноатида ўз ўрнига эга италиялик актриса Моника Белуччи 30 сентябрь куни 60 ёшга тўлди. Ўзига хос жозиба, аслзодаларга хос қараш ва нафислик мужассам бўлган актрисанинг шахсий мода услуби мавжуд. AdMe нашри Моника Белуччининг бундай нафис кийиниш услуби ва гўзаллик сирлари нимада эканини аниқлашга қарор қилди.
Леопард принтли матоларни база кийим сифатида қўллаш
Мониканинг севимли ва тез-тез фойдаланадиган матоларидан бири леопард тасвирли кийимлардир. Актриса бундай ёрқин тасвирли либосларни кийишдан уялмайди ва ўзининг латофатли кўриниши туфайли мато актриса эгнида табиий ва қулай кўринади.
Моника бошқа юлдузлардан фарқли ўлароқ оммага калта юбка ва либосларда намоён бўлмайди ва асосан миди ҳамда макси узунликларга урғу беради.
Одатий кун учун ҳам, оқшомга ҳам бирдек мос келадиган либос танлаш
Белуччи ўзининг гардеробида кундалик кийимни расмий кечки либосга осонгина ўзгартириш мумкин бўлган образлар бўлиши кераклигини айтган:
“Содда кўринишдаги қора кўйлакни турли заргарлик буюмлар ва аксессуарлар билан тўлдириш орқали уни байрамона кўйлакка айлантириш мумкин”.
Классика Мониканинг жон-у дили
Кундалик ҳаётда актриса кўпинча оқ кўйлак ва текис бичимли қора юбка кияди. Бу образни ҳар қандай устки кийим билан мослаштириш осон бўлиб, ортиқча ҳаракатларсиз назокатли кўриниш имконини беради.
Белуччи мода ва турли брендлар ортидан қувмайди ва “мода қурбони” эмаслиги билан фахрланади. Актриса шунчаки ўзига нима мос келишини билади, шунинг учун турли дўконларда айланиш учун соатлаб вақтини кетказмайди.
Энг идеал узунлик — миди
Белуччи камдан-кам ҳолларда калта кўйлакда намоён бўлади ва очиқ юбкаларни ёқтирмайди:
“40 ёшдан ошганингизда инсонларга ёш қиздек кўринишга ҳаракат қилишдан маъно йўқ. Бизнинг ёшимизда аёлларга хос нафис бўлишга эътибор қаратганимиз маъқул, деб ўйлайман”, — дейди актриса.
Ёрқин бўлмаган макияж
Ҳар қандай образга тугал кўриниш берадиган детал бу косметикадир, аммо Моника ҳеч қачон ўта қуюқ макияждан фойдаланмайди. Актриса юзидаги табиий ифода йўқолишини истамайди ҳамда энг йирик тадбирларга ҳам нейтрал кўринишда ташриф буюришга ҳаракат қилади.
Актрисанинг энг севимли ранги — қора
Белуччининг кўплаб қора либослари орасида классик қора костюм алоҳида ўрин тутади. Унинг гардеробида ёрқин рангли либослар ҳам бўлса ҳам, асосий қисмини сокин ва тўқ рангли либослар ташкил қилади. Моника айтганидек, мода қоидалари уларни бузиш учун ўйлаб топилган.
Изоҳ (0)