Тарихий фильмлар ва фантастик жанрдаги картиналар кўзни қувонтиради. Фильмдаги биз ҳар куни кўчада кўрган нарсалардан миллион марта фарқ қиладиган либосларга қойил қолиш мумкин. Баъзида либослар бўйича дизайнерлар ҳатто қадимги портретлар, архив фотосуратлар қаҳрамонларининг кийимлари ва аксессуарларидан нусха ҳам кўчиради.
“Икки қиролича”, 2018
“Икки қиролича” фильмида Марго Робби Елизавета I ролини ўйнайди, қиролича образларидан бири ўта аниқлик билан қайта яратилган. Ижодкорлар образ яратишда маълумотнома бўлиб хизмат қилган портрет асрлар давомида сезиларли даражада хиралашганини эътибордан четда қолдирмайди: агар расмда олтин нақшли кулранг-кўк либосни кўрсак, фильмда худди шу нақшлар ёрқинроқ матони безатади. Елизавета I бокиралиги рамзи сифатида тақиб юрган қўш ипли марварид ҳам фильм ижодкорларининг эътиборидан четда қолмаган.
“Титаник”, 1997
Ўша даврда қуш инига ўхшаш деталлар машҳурликнинг энг юқори чўққисида бўлган бош кийимларнинг безаклари эди. Бироқ катта бантли шляпалар ҳам трендда эди: бу моделни 1911-1912 йиллардаги мода каталогларида топиш мумкин. Фильм ижодкорлари қуш инига ўхшаш шляпалардан кўра уларга муқобил бўлган катта бантли бош кийимдан фойдаланишга қарор қилади.
“Хўрланганлар”, 2012
Вояга етган Козетта учун либос танлашда ижодкорлар томошабинда боғ гуллари билан ассоциация уйғотишга ҳаракат қилади. Шунинг учун улар қизга шафтоли ва нилуфар рангдаги костюмларни танлайди. Фильм ижодкорлари ўша пайтдаги модани ҳам эътиборсиз қолдирмайди. Мисол учун, Октав Узаннинг “Париждаги мода: 1797 йилдан 1897 йилгача аёл диди ва эстетикасининг турли босқичлари” китобида 1830 йилдаги настаринранг кўйлак кийган аёл расмини кўриш мумкин, бу Козеттанинг образларидан бирини эслатади. Аммо қиз 1830 йилларда яшаган.
“Кичик хонимлар”, 2019
“Кичик хонимлар” фильмининг либослар бўйича дизайнери машҳур рассомлар асарларидан илҳомланган. Флоренс Пью қаҳрамонининг Париждаги либослари импрессионистлардан олинган. Мисол учун, қиз Лорининг турмуш қуриш таклифини қабул қилгандаги либоси Клод Моненинг “Боғдаги аёллар” картинасидаги қаҳрамонлардан бирининг кийими билан деярли бир хил.
“Малефисента”, 2014
Фильмдаги Аврора образи Уотерхауснинг “Офелия” суратига ишора беради. Фильм либослари дизайнери Анна Шеппард машҳур суратлардан илҳом олганини тан олади. “Мен Аврора нимфага ўхшаб, бегуноҳ ва нафис кўринишини хоҳладим. У бошқа персонажлардан фарқ қилиши керак эди”, — дейди либослар дизайнери.
“Шерюрак”, 2012
Маълум бўлишича, аниматорлар қаҳрамонлар учун либос танлашда рассомлар ижодини эътиборсиз қолдирмайди. Шундай қилиб, тармоқ фойдаланувчилари “Шерюрак” анимацион фильмининг бош қаҳрамони онасининг либоси Саргентнинг “Леди Макбет” либосига мос келишини пайқайди. Мультфильм воқеалари Шотландияда бўлиб ўтади, қизиқарли томони Леди Макбет ҳам шотландиялик.
“Присцилла: Элвис ва мен”, 2023 йил
Костюм дизайнерига Присцилланинг тўй либосини қайта яратиш топширилганида, уни ўрганиш учун оригинал кийимни кўришга ҳаракат қилади. Аммо кийимни олишнинг иложи бўлмайди. Шу сабабли либослар дизайнерининг фақат архив фотосуратларига эътибор қаратиб, дизайнни нолдан ишлаб чиқишдан бошқа иложи йўқ эди. Шунинг учун мутахассис қаттиқ ишлашга мажбур бўлади. У шунингдек, винтаж коллекцияларидан тўр намуналарини олиш учун Chanel уйига мурожаат қилади ва мос келадиган тўр нусхасини буюртма қилади.
Изоҳ (0)