Шарқ тўйлари ва келинлари ҳар доим ҳашамат ва нафислик тимсоли бўлиб келган. Келинчакларнинг тўй либослари нафақат урф-одат ва анъаналарга содиқликни, балки замонавий мода билан ҳамнафасликни акс эттиради. Бежирим безаклар, нафис матолар ва аксессуарларнинг барчаси шарқона гўзалликка ўзгача назар солишга ундайди. Ушбу мақолада тўй маросимида машҳур араб келинларининг энг гўзал образларини кўриб чиқамиз.
Қиролича Рания
Иордания қироличаси Рания 1993 йил 10 июнда қирол Абдулла II билан турмуш қурган. Тўй маросими Уммон шаҳрида ҳашаматли тарзда ўтказилган.
Қиролича Рания тўй куни Dior мода уйининг дизайнери, британиялик Брюс Олдфилд муаллифлигида яратилган фил суяги рангли либосда намоён бўлган. Келин кўйлаги тилла кашта билан тикилган, елка қисми кенг, узун енгли ва нафис атлас матодан тайёрланган бу либос Шарқона нафислик ва Европа услубининг уйғунлигини намойиш этган. Либоснинг асосий безаги нозик кашталар ва марварид доначалари бўлиб, унга янада жозиба бағишлаган.
Унинг образини ўзига хос бош соч турмаги ва узун шифон фата тўлдирган. Минималистик услубдаги зеб-зийнатлар унинг табиий гўзаллигини янада тўлдирган ва қироличага ўзига хос латофат бахш этган.
Малика Имон
Қирол Абдулла II ва қиролича Раниянинг қизи малика Имон 2023 йил 12 март куни Уммондаги Байт ал-Урдун саройида венесуэлалик тадбиркор Жамил Александр Термиотисга турмушга чиқди. Ушбу маросим ҳашамат ва гўзал тарзда ўтиб, малика Имон ўзининг қимматбаҳо келинлик образи билан барчани ҳайратга солди.
Малика Имон маросимда Dior мода уйининг дизайнерлари томонидан яратилган нафис оқ либосда намоён бўлди. Келинлик кўйлаги классик услубда бўлиб, узун енглари ва атлас матоси билан ҳам ишланган. Либос ўзининг минималистик, аммо виқорли дизайни билан маликаларга хос жозибани намоён этган.
Маликанинг образини онаси, қиролича Рания ҳам ўзининг тўйида тақиб чиққан тиара билан бойитилди. Ушбу бежирим келинлик образи билан малика Имон ҳақиқий замонавий шарқ маликаси сифатида барчанинг эътиборини қозонди.
Ражва ал-Саиф
2023 йил 1 июнда Ражва Ал-Саиф Иорданиянинг валиаҳд шаҳзодаси Ҳусайнга турмушга чиқди. 29 ёшли келин ливанлик дизайнер Элиэ Сааб томонидан яратилган тўй либосида намоён бўлди.
Ушбу либос ноодатий бичими, узун енглари ва бежирим кашталари билан ажралиб туради. Келинлик либоси дизайни классик қироллик услубида бўлиб, узун шлейф билан тўлдирилган эди.
Ражва никоҳ маросимида Иордания қироллик оиласи анъаналарига ҳурмат бажо келтириб, табиий макияж билан кўриниш берган. Ўша куни кечқурун бўлажак Иордания қироличаси оқ қўлқоплар билан тўлдирилган калта енгли Dolce & Gabbana либоси — иккинчи образини кийган.
Амал Клуни
Актёр Жорж Клуни ва халқаро ҳуқуқшунос, инсон ҳуқуқлари фаоли Амал Аламуддин 2014 йилда Венецияда Aman Canal Grande меҳмонхонасида никоҳ тўйини нишонлаган. Оқ атиргуллар билан безатилган ҳашаматли залда келин қўлида оқ атиргул гулдастасини ушлаб, елкаси очиқ ва узун фатали Oscar de la Renta либосида пайдо бўлди. Анна Винтур, Мэтт Деймон ва Эмили Блантни ўз ичига олган юлдузли меҳмонлар рўйхати билан нишонланган тўйда барчанинг нигоҳи келинда бўлди.
Лана Эл-Саҳели
Ливанлик мода блогери ва журналист Лана Эл-Саҳели (L’Аrmoire de Lana блоги муаллифи) 2015 йилда Али Авадга турмушга чиқди. Уларнинг тўйи Шарқнинг замонавий маликаларига хослиги билан кўпчиликнинг эътиборини тортди. Лана Эл-Саҳели тўй маросимида таниқли Элиэ Сааб томонидан махсус тикилган нафис оқ либосни кийган. Келин кўйлакнинг дизайни классик қироллик услубидан илҳомланган бўлиб, унинг кенг юбкаси ва нафис кесими унга ҳақиқий малика қиёфасини берган.
Кристина Карам
Кристина Карам ва Жан Рамия меҳмонларини ажойиб гулли йўлак, яккашохли инсталляция, концертга ўхшаш ёритиш ускуналари ва ҳаттоки гимнастлар иштирокидаги сеҳрли тўй байрами билан ҳайратда қолдирди. Кенг ва узун шлейфли дабдабали тўй кўйлаги Krikor Jabotian брендидан буюртма асосида тикилган.
Сабин Ганем
Миср-ливанлик заргарлик буюмлари дизайнери Сабин Ганем миллиардер ва дунёдаги энг бадавлат сулола вакили Жозеф Гетти билан “Хавфли алоқалар” фильмидан илҳомланган маросимда турмушга чиқди — тўй Римда бошланиб, Санти XII Апостоли базиликасида давом этгач, қирғоқ бўйлаб давом этди. Келиннинг буюртма асосида тикилган Schiaparelli кўйлаги ва Маисон Лесаге томонидан кашталар билан безатилган капюшонли накидкаси ҳаммада унутилмас таассурот қолдирди. Худди шу мотивлар нафақат кўйлакда, балки пойабзалда ҳам акс этди.
Изоҳ (0)