Собиқ фигурали учувчи ва Vogue мода журнали муҳаррири Вера Вонг 40 ёшида ўз бизнесини бошлади. Вера тўй либослари индустриясини бутунлай ўзгартириб оламшумул бренд яратди. Бугунги кунда дизайнернинг номи машҳур телекўрсатувларда тилга олинади ва унинг мижозлари донғи кетган таниқли шахслар.
Вера Эллен Вонг 1949 йил 27 июнда Нью Йоркда хитойлик муҳожирлар оиласида туғилган. Унинг онаси БМТда таржимон бўлиб ишлаган, отаси эса тиббиёт компаниясига эгалик қилган. Оила шаҳарнинг юқори Шарқий томонида яшарди.
Вонгнинг сўзларига кўра, унинг модага қизиқиши онаси туфайли пайдо бўлган, онасининг бежирим кийиниши қизда ўзгача таассурот уйғотарди. Коллеждаги ёзги таътил пайтида бўлажак модел ҳатто Yves Саинт Лаурент дўконида сотувчи бўлиб ҳам ишлаган.
8 ёшида Вера фигурали учиш билан шуғуллана бошлайди. 1968 йилда у АҚШ чемпионатида иштирок этган, у ҳатто Олимпиадага йўл олиши мумкин эди, аммо саралашдан ўта олмаган. Гарчи бу муваффақиятсизлик унинг спорт карьерасини тугатган бўлса-да, қизни бошқа ўзгаришлар томон йўналтирди:
“Мен асабий бўлиб қолгандим ва семестрни қолганини Парижда ўтказдим. Айнан шу ерда модага қизиқишимни англадим”.
Кейинчалик Вера бир нечта фигурали учувчилар учун либослар дизайнини яратди, улар орасида Ненси Керриган ва Мишел Кванлар ҳам бор эди. 2010 йилда Ванкувер Олимпиадасида Вонг яратган либосда қатнашган фигурали учувчи Эван Лайсачек эса олтин медални қўлга киритади. Аёлнинг ўзи спорт уни интизомга ўргатганини тан олади: “Йиқилсангиз, ўрнингиздан турасиз ва яна уриниб кўрасиз.”
Бўлажак дизайнер Франциядаги Сорбонна университетида ўқиб, Сара Лоуренс коллежида санъацҳунослик даражасини олган. Аммо 1971 йилда Вера Вонг Vogue журналида ассистент бўлиб ишлай бошлайди ва тез орада журналнинг энг ёш муҳарририга айланади.
“Қаттиққўл хоним — бу Vogueда ишлашнинг юмшоқ талқини”, дейди Вера. Биринчи кун у ерга кўйлак ва платформали туфлида борганман. Муҳаррир мени кўриб:“Уйга бориб, кийимингни алмаштир. Vogueда бундай кийинишмайди!”, деб бақирган. Мен дарҳол жинси шим, кроссовка ва футболка кийиб олганман”.
Vogueда 17 йил ишлагандан сўнг, Вера Вонг мода муҳаррири лавозимидан кетиб, журнални дугонаси Анна Винтурга топширади. Кейинчалик Ralph Lauren компаниясида дизайнер бўлиб ишга киради.
Вера Вонг биринчи тўй либосини ўзи учун тиккан. 1989 йилда дизайнер инвестор Артур Беккер билан унаштирилади. Тўйга тайёргарлик кўришар экан, 39 ёшли келин унинг ёшидаги аёллар учун тўй либослари унчалик кўп эмаслигини тушунади. Шунда у бутун саноатни ўзгартиришга қарор қилади.
“Мен либослар дизайни ҳақида ҳеч нарса билмасдим. Ralph Lauren компаниясидан кетганимдан сўнг авваллари мен учун очиқ бўлган кўплаб эшиклар ёпилди. Бу хоҳ мато ишлаб чиқарувчиси бўлсин, хоҳ мен бормоқчи бўлган зиёфат”.
Бундай пайтда Верани отаси қўллаб-қувватлайди. Бизнесмен сифатида у қизига унинг ғояси ажойиб эканини айтиб, одамлар ҳар доим турмуш қуришади, демак, мижозлар оқими барқарор бўлади, дейди.
1990 йилда Вера Нью Йоркдаги Carlyle меҳмонхонасида ўз салонини очади. Бир неча йил ўтгач, унинг салони тадбирлар учун либослар яратишни бошлайди. Шу билан бирга, Вера ва Артур Беккер икки нафар қизни асраб олишади: Сесилия ва Жозефина.
Вера Вонгнинг тўй либослари нафақат оддий қизларнинг, балки машҳурларнинг ҳам орзусига айланади. Унинг мижозлари орасида Виктория Бекҳэм, Гвен Стефани, Мерайя Кери, Ариана Гранде, Ким Кардашьян, Хейли Бибер, Тина Кунаки, Женнифер Лопес ва бошқа кўплаб машҳурлар бор.
“Ғийбатчи қиз” сериалидаги Блер Уолдорф Веранинг тўй либосида турмушга чиқади. “Келинлар жанги” фильмида эса Кейт Хадсон қаҳрамони кейинчалик машҳур бўлиб кетган ҳазил иборани айтади: “Сиз Вера Ванг либосини ўзингизга мослаштиролмайсиз, ўзингизни либосга мослаштирасиз”.
Вера Вангнинг либослари “Гремми” ва “Оскар” каби йирик тадбирларда ҳам кўзга ташланади.
“Мен учун қулайлик жуда муҳим. Яратган либосларимни кийган аёлларнинг аксарияти ёнимга келиб: “Сизнинг кўйлагингизда ўзимни жуда қулай ҳис қилдим”, дейишади”, деди дизайнер.
Веранинг ижтимоий тармоқларда ҳам саҳифаси бор ва у ерда қаҳрамонимиз рақс тушаётганини, дизайнерлик ишлари ва кийим жавонидаги буюмларини намойиш этаётган видеоларни жойлаштиради. Яқинда берган интервьюсида дизайнер режиссёрлик касбини эгалламаганидан энг кўп афсусланишини тан олди.
Қизиғи шундаки, 2009 йилда дизайнер Barbie қўғирчоғи учун тўй либосини яратди ва 2021 йил май ойида бренд қўғирчоқни Вера Вонг қиёфасида ишлаб чиқарди.
Кўпчилик мухлислар фикрига кўра, Вера 72 ёш бўлишига қарамай жуда ёш кўринади. Дизайнернинг айтишича, бунинг сири шундаки, у кўп йиллар давомида профессионал фигурали учувчи бўлган ва унинг танаси “мушак хотираси”га эга, шунингдек, у ҳозиргача спорт билан шуғулланади.
Изоҳ (0)