Toshkentdagi Yoshlar ijod saroyida o‘zbek milliy modasining jozibasi, zamonaviy tendensiyalar va an‘anaviy uslublarning o‘zaro uyg‘unligi namoyon bo‘lgan “Milliy Fashion Show” modalar namoyishi bo‘lib o‘tdi.
Tadbir milliy liboslarni keng targ‘ib qilish, yosh dizaynerlarni qo‘llab-quvvatlash hamda xalqning o‘z an‘ana va qadriyatlariga bo‘lgan hurmatini yana bir bor yuksaltirish maqsadida tashkil etildi.
Namoyishda nafis va betakror milliy liboslar taqdim etilib, an’anaviy bezaklar zamonaviy moda uslublari bilan uyg‘unlashgan holda moda ixlosmandlariga havola qilindi.
Tadbir davomida san’atkorlarning jonli chiqishlari bayramona ruh bag‘ishlab, tadbirga yanada ko‘tarinkilik baxsh etdi. Shuningdek, milliy hunarmandlar ko‘rgazmasi ham tashkil etilib, unda respublikaning turli hududlaridan kelgan mohir ustalar tomonidan yaratilgan nafis hunarmandchilik buyumlari taqdim etildi.
Mehmonlar milliy zardo‘zchilik, milliy o‘yinchoqlar, oddiy metallardan milliy uslubda tayyorlangan taqinchoqlar, kandakorlik, misgarlik buyumlari, kulolchilik, zargarlik va yog‘och o‘ymakorligi kabi san‘at turlarining eng sara namunalari bilan yaqindan tanishish imkoniga ega bo‘lishdi.
Modalar namoyishi mehmonlarga zamonaviy dizaynerlar tomonidan tayyorlangan eksklyuziv milliy kolleksiyalar, ipak va atlas matolar jozibasi, nafis kashtalar hamda milliy modaning eng yangi yo‘nalishlari bilan tanishish imkonini berdi.
Milliy liboslar namoyishiga bag‘ishlangan bunday ko‘rgazmalar yosh avlodning milliy qadriyatlarimizga bo‘lgan hurmatini oshirish, an‘analarimizni asrab-avaylash va qadrlashda muhim ahamiyat kasb etadi.
Shu munosabat bilan O‘zbekiston yoshlar ittifoqi ushbu loyihani #MilliyLiboslarMilliyG‘urur chellenji sifatida davom ettirib, milliy modani keng ommaga targ‘ib qilishni maqsad qilgan.
Izoh (0)