Кобулда хорижий оммавий ахборот воситаларига маълумот ва дастурларни “рухсатсиз узатгани” учун аёлларнинг Радио Бегум радиостанцияси фаолияти тўхтатилди. Бу ҳақда CNN хабар берди.
“Толибон” Ахборот ва маданият вазирлиги вакиллари радиостанцияси биносини тинтув қилган. Тинтув чоғида ходимларнинг, жумладан, журналист аёлларнинг компьютерлари, қаттиқ дисклари, файллари, телефонлари мусодара қилинган. Станцияда ишлайдиган, аммо раҳбарлик лавозимларини эгалламаган икки эркак ҳам қўлга олинган.
Кейинроқ вазирлик “эфирга узатиш сиёсати ва лицензиядан нотўғри фойдаланиш” туфайли радиостанция фаолияти тўхтатилганини тасдиқлаган. Даъволар орасида “хорижий телеканалга контент ва дастурларни рухсатсиз тақдим этиш” кўрсатилган. Хабарда қайси телеканал ҳақида гап кетаётгани аниқланмаган, бироқ радиостанция келажаги “ўз вақтида” белгиланиши айтилган.
Радиостанция фаолиятини тўхтатиш тўғрисидаги қарор инсон ҳуқуқлари ташкилотлари, жумладан, “Чегара билмас мухбирлар” (РСФ) томонидан қораланган. Улар тақиқни дарҳол бекор қилишга чақирган.
Радио Бегум фаолияти тўхтатилишидан олдин кунига олти соатлик таълим дастурларини, шунингдек, бутун Афғонистон бўйлаб аёлларга мўлжалланган саломатлик, психология ва маънавиятга оид контентни эфирга узатган. Станция раҳбарияти таъкидлашича, уларнинг мақсади сиёсий фаолият билан шуғулланмасдан қизларга таълим бериш ва аёлларни қўллаб-қувватлашдан иборат эди.
“Толибон” ҳокимият тепасига келгач, хотин-қизларга нисбатан кўплаб чекловлар жорий этилди. Тақиқлар туфайли аёллар ва қизлар таълим олиш, ишлаш, спорт, саёҳат қилиш ва дам олиш ҳуқуқидан маҳрум қилинди.
Афғонистонда аёлларга нисбатан жорий қилинган айрим тақиқлар қуйидагилар:
- афғонистонлик аёлларнинг БМТ идораларида ишлаши;
- эркакларга аёллар учун кийим тикиш;
- аёлларнинг эркак шифокорларга бориши;
- аёлларнинг шифохонага ёлғиз бориши;
- аёлларнинг истироҳат боғига ташриф буюриши,
- оилалар ва аёлларнинг боғлари ёки яшил ҳудудлари бўлган ресторанларга кириши,
- аёллар овози эшитилган рекламаларни эфирга узатиш,
- аёлларнинг сотувчилари билан савдолашиш,
- акушер ва ҳамшираликка ўқиш,
- аёл дикторларга телевизордаги янгиликларни ўқишни ва аёл журналистларга матбуот анжуманларига бориш,
- аёлларга бир-бири билан гаплашиш тақиқланган.
Изоҳ (0)