“Толибон” аёл дикторларга телевизордаги янгиликларни ўқишни ва аёл журналистларга матбуот анжуманларига боришни тақиқлади. Бу ҳақда Solhnews хабар берди.
Solhnews хабарига кўра, буйруқ Фазилатни тарғиб қилиш ва иллатларнинг олдини олиш бошқармаси томонидан берилган. Телеекранларда аёлларнинг пайдо бўлиши ва уларнинг овозлари “эркаклар учун провокация” экани таъкидланган. Ҳирот бошқармаси оммавий ахборот воситаларини бу қоидани бузмасликка чақирган. “Толибон” расмий равишда тегишли буйруққа изоҳ бермаган. Бундай тақиқ Қандаҳорда 2021 йилда ҳам “Толибон” томонидан киритилган.
“Толибон” ҳокимият тепасига келгач, хотин-қизларга нисбатан кўплаб чекловлар жорий этилди. Тақиқлар туфайли аёллар ва қизлар таълим олиш, ишлаш, спорт, саёҳат қилиш ва дам олиш ҳуқуқидан маҳрум қилинди.
Афғонистонда аёлларга нисбатан жорий қилинган айрим тақиқлар қуйидагилар:
- афғонистонлик аёлларнинг БМТ идораларида ишлаши;
- эркакларга аёллар учун кийим тикиш;
- аёлларнинг эркак шифокорларга бориши;
- аёлларнинг шифохонага ёлғиз бориши;
- аёлларнинг истироҳат боғига ташриф буюриши,
- оилалар ва аёлларнинг боғлари ёки яшил ҳудудлари бўлган ресторанларга кириши,
- аёллар овози эшитилган рекламаларни эфирга узатиш,
- аёлларнинг сотувчилари билан савдолашиш,
- акушер ва ҳамшираликка ўқиш,
- аёлларга бир-бири билан гаплашиш тақиқланган.
Канада, Австралия, Германия ва Нидерландия аёллар дискриминацияси туфайли Халқаро судга “Толибон” устидан даъво аризаси билан мурожаат қилмоқчи.
Изоҳ (0)