“Толибон” Кобулда эмлашни тўхтатди

Associated Press агентлиги БМТга таяниб, “Толибон” Афғонистонда полиомиелитга қарши эмлаш кампанияларини тўхтатгани ҳақида хабар берди.

Нашрга кўра, эмлаш тўхтатилгани ҳақидаги хабар эмлаш кампанияси бошланиши арафасида БМТ агентликларига етказилган. Қайд этилишича, эмлашни тўхтатиб туриш учун ҳеч қандай сабаб келтирилмаган, “Толибон” расмийлари эса ҳолат юзасидан изоҳ бермаган.

Икки вакцина манбаси полиомиелитга қарши вакцина кампаниясининг янги босқичи ўтган ҳафтада Кобул шаҳрида бошланиши кераклигини, аммо расмийлар кампания кейинги огоҳлантиришгача тўхтатилишини эълон қилган.

Аёл вакциначилардан бири Daily Informаtion нашрига полиомиелитга қарши эмлаш кампаниясининг тўхтатилиши сабаби ҳалигача номаълумлигини айтган. Бироқ унинг қўшимча қилишича, баъзи координаторлар ўз ходимларига эмлаш кампанияси фақат аёл вакцинаторлар учун тўхтатилганлиги ҳақида хабар беришган.

Шу билан бирга, манбанинг таъкидлашича, ҳозирча эмлаш кампаниясининг тўхтатилиши сабаби ушбу кампания мутасаддилари томонидан эълон қилинмаган.

“Эндиликда аёлларга эмлаш бўйича ишлашга рухсат берилмайди, деган хавотирлар мавжуд”, дейилади хабарда.

“Толибон” аввалроқ баъзи вилоятларда эмловчи аёллардан эркак маҳрам бўлишини талаб қилган, бошқа вилоятларда эса аёлларни кампаниядан четлатган. Жаҳон соғлиқни сақлаш ташкилоти Афғонистондаги эмлаш кампанияларида аёлларнинг иштироки 20% атрофида қолаётганини айтган.

Қандаҳор шаҳридаги манбаларга кўра, вилоятда полиомиелитга қарши эмлаш кампанияси “масжидма-мажид” асосида олиб борилмоқда, бироқ аёллар эмлаш кампанияларида иштирок этмаяпти.