Украина президенти Владимир Зеленский Киев ва Вашингтон ўртасида табиий ресурслар бўйича “якуний келишув”га эришилганини тасдиқлади. Бу ҳақда у 26 февраль куни бўлиб ўтган матбуот анжуманида маълум қилди.
Унинг айтишича, Америка томони билан музокараларда у кўтарган асосий масалалар келишув матнида тегишли тарзда акс эттирилган.
Мен учун энг муҳими, биз қарздор эмасмиз, келишувда на 500 миллиард, на 350 миллиард, на 100 миллиард қарз ҳақида гап кетган. Бу бизга нисбатан адолатсизлик бўларди, деди Зеленский.
У, шунингдек, келишувда хавфсизлик кафолатлари Украина хоҳлаганидек кўринишда ёзилмаганини, аммо улар тилга олинганини айтди.
У ерда Украина истаган барча хавфсизлик кафолатлари йўқ, лекин мен у ерда ҳеч бўлмаганда кафолатлар ҳақида таклиф бўлишини хоҳлардим ва у доиравий келишувда 10-бандида мавжуд, деди Украина президенти.
Бир кун олдин оммавий ахборот воситалари Украина вакиллари АҚШ президенти Дональд Трамп маъмурияти билан табиий ресурслар бўйича келишув шартларини келишиб олганини хабар қилган эди. Financial Times маълумотларига кўра, АҚШ Украина табиий ресурслардан фойдаланишдан 500 миллиард доллар потенциал даромад олиш талабидан воз кечганидан сўнг, Киев минерал ресурсларини, жумладан нефть ва газни биргаликда ўзлаштириш бўйича келишувни имзолашга рози бўлган.
Financial Times танишиб чиққан 2025 йил 24 февралдаги ҳужжатга кўра, келишувда қуйидагилар акс этган:
- Украинага тегишли фойдали қазилмалар, жумладан нефть, газ ва уларни қазиб олиш билан боғлиқ инфратузилмани келажакда монетизация қилишдан олинган даромадларнинг 50 фоизини ўтказадиган жамғарма ташкил этиш;
- Ушбу жамғарма маблағлари Украинанинг ўзидаги инвестиция лойиҳаларига йўналтирилади;
- АҚШнинг жамғармадаги улуши қанча бўлиши ва ресурсларга “биргаликда эгалик қилиш” шартлари ҳали ноаниқ.
Келишувга аллақачон Украина ҳукумати бюджетини тўлдираётган минерал ресурслар кирмайди, яъни у Украинадаги энг йирик газ ва нефть ишлаб чиқарувчилари бўлган “Нафтогаз” ёки “Укрнафт”нинг жорий фаолиятини қамраб олмайди.
Украина расмийларининг айтишича, келишув адлия, иқтисодиёт ва ташқи ишлар вазирлари томонидан маъқулланган. Шунингдек, президент Владимир Зеленский яқин ҳафталарда Трамп билан ҳужжат имзолаш маросими учун Оқ уйга ташриф буюриши кутилмоқда.
Изоҳ (0)