АҚШ президенти Дональд Трампнинг Украинада президентлик сайловларини ўтказиш зарурлиги ҳақидаги баёнотлари унинг Владимир Зеленскийдан қутулишни истаётганидан далолат бермоқда, деб ёзмоқда Британиянинг The Economist журнали манбаларга таяниб.
Трамп, чамаси, ўзи ҳеч қачон ёқтирмаган ва мураккаб шахс деб ҳисоблаган Зеленскийдан қутулмоқчи. Гап сайловлар ҳақида эмас, балки Зеленскийдан қутулиш ҳақида кетмоқда, дея таъкидлайди нашр суҳбатдоши.
Нашрда ёзилишича, назарий жиҳатдан Украина Трампнинг Россия билан тинчлик музокаралари ҳақидаги таклифини рад этиб, жанговар ҳаракатларни давом эттириши мумкин, аммо амалда воқеаларнинг бундай ривожланиши Киевнинг аҳволи тез орада ёмонлашишига олиб келади.
Украина армиясида оператив даражада жиддий муаммолар мавжуд ва стратегик режалаштириш деярли йўқ, олдинги чизиқдаги бўлинмаларда шахсий таркиб кескин етишмайди, баъзи бригадалар сони одатдаги сонининг учдан биридан ҳам камроққа қисқарган, дейилади хабарда.
Журналнинг баҳолашича, Трампда Украинага таъсир ўтказиш учун кўплаб дастаклар мавжуд – у Россиядан санкцияларни бир томонлама бекор қилиши ва эҳтимол Киевга ҳарбий ёрдамни қисқартириши ёки бутунлай тўхтатиши мумкин. Бундан ташқари, Трамп АҚШдан разведка маълумотлари оқимини тўхтатиши ва Украина армияси бўлинмаларининг ўзаро алоқаси учун асос бўлган Starlink сунъий йўлдош терминалларини ўчириб қўйиши мумкин.
Аввалроқ Трамп, агар Киев келишув бўйича музокаралар столида ўрин олишни истаса, Украина президентлик сайловларини ўтказиши кераклигини айтганди.
Трамп Зеленскийни “сайловсиз диктатор” деб атади
Сайловсиз диктатор. Зеленский тезроқ ҳаракат қилиши керак, акс ҳолда унинг мамлакати буткул тамом бўлади. Биз Россия билан урушни тугатиш бўйича музокараларни муваффақиятли олиб бормоқдамиз. Буни фақат Трамп ва унинг маъмурияти уддалай олишини барча эътироф этди, дейди АҚШ етакчиси.
У “Украинани яхши кўриши, бироқ Зеленский жуда ёмон иш қилгани сабабли унинг мамлакати вайрон бўлгани ва миллионлаб одамлар сабабсиз ҳалок бўлгани”ни қўшимча қилди.
Трампнинг таъкидлашича, Зеленский АҚШни “ҳеч қачон бошланмаслиги керак бўлган, ғалаба қозониб бўлмайдиган уруш учун” 350 миллиард доллар ажратишга кўндира олган. Украина президенти Вашингтон Киевга гўёки 500 миллиард долларлик ёрдам бергани ҳақидаги маълумотлар ҳақиқатга тўғри келмаслигини айтди.
Зеленский ўз рейтингининг 4 фоизга тушгани ҳақидаги маълумотларни дезинформация деб атади ва уни давлат раҳбари лавозимидан ҳозир алмаштириб бўлмаслигини айтди.
Украинада президентлик сайловлари 2024 йил март ойида бўлиб ўтиши керак эди. Зеленскийнинг ваколатлари ўша йилнинг 20 майидан кейин расман тугади. Шу билан бирга, унинг ўзи қонунийлик масаласи уни ташвишга солмаслигини айтди.
Изоҳ (0)