АҚШ суди президент Дональд Трамп маъмуриятига икки кун ичида АҚШ Халқаро тараққиёт агентлиги (USAID) линияси бўйлаб хорижий ёрдамни тиклаш мажбуриятини юклади. Бу ҳақда Associated Press хабар берди.
Ҳукм USAID’нинг барча дастурларини молиялаштиришни тўхтатишга қарши даъво бўйича Колумбия округи судида бўлиб ўтган эшитув натижаларига кўра чиқарилди. Округ судьяси Амир Алининг айтишича, расмийлар блокдан чиқариш тўғрисидаги аввалги қарорни бажармаган.
Судга шикоят нотижорат ташкилотлари томонидан киритилган. Улар USAID ва давлат департаменти орқали хорижга кўрсатиладиган ёрдамнинг тўхтатилишини танқид қилмоқда. Трамп 20 январь куни ўз лавозимига киришганидан сўнг дарҳол бошқа мамлакатларга ривожланиш учун ёрдам кўрсатишни 90 кунга тўхтатиш тўғрисидаги фармонни имзолади. У шу тариқа “самарасиз” деб баҳолаган хорижий дастурларни тўхтатиб қўйди.
Хорижда ишловчи нодавлат ташкилотлари ва федерал маблағ оладиган бизнеслар бу федерал қонунни бузишини ва зарурий ҳаётий ёрдам кўрсатишни чеклаганини таъкидлади.
USAID ва давлат департаменти ҳамкорларига кўра, маъмурият уларга тўланиши керак бўлган юзлаб миллион долларни бермаяпти, бу эса ўн минглаб ходимларни ишдан бўшатишга ва баъзи ташкилотларни молиявий фалокатга олиб келмоқда.
Давлат котиби Марко Рубио февраль ойи охирида давлат департаменти ва USAID томонидан молиялаштириладиган АҚШнинг барча хорижий ёрдамини тўхтатди. Ҳукуматнинг Самарадорлик департаменти (DOGE) раҳбари Илон Маск USAID менежерлари билан боғлиқ муаммолар туфайли ходимлар “маъмурий таътилга чиқарилганини” айтган эди.
USAID ҳақида
Ташкилот 1961 йилда АҚШ президенти Жон Кеннедининг хорижий мамлакатларга ёрдам кўрсатиш тўғрисидаги қонуни қабул қилинганидан сўнг ижро фармони билан ташкил этилган. Агентлик АҚШнинг халқаро ривожланиш масалалари билан шуғулланган бир нечта аввалги идораларининг вазифаларини ўзида мужассамлаштирди. USAID 1998 йилдан бери мустақил агентлик мақомига эга.
USAID’нинг умумий сиёсий раҳбарлигини АҚШ давлат котиби амалга оширади, шунингдек, агентлик президент ва Миллий хавфсизлик кенгашига бўйсунади. Директор ва унинг икки ўринбосарини АҚШ президенти конгресс розилигини олиб тайинлайди.
Ташкилотнинг бюджети 50 миллиард доллардан ошган. Бугунги кунда унинг таркибида 10 мингдан ортиқ ходим ишлайди, уларнинг учдан икки қисми Қўшма Штатлардан ташқарида фаолият юритади. Ташкилот таркибига бир нечта минтақавий ва ихтисослашган бюролар киради.
Изоҳ (0)