Ukraina prezidenti Vladimir Zelenskiy Kiyev va Vashington o‘rtasida tabiiy resurslar bo‘yicha “yakuniy kelishuv”ga erishilganini tasdiqladi. Bu haqda u 26-fevral kuni bo‘lib o‘tgan matbuot anjumanida ma’lum qildi.
Uning aytishicha, Amerika tomoni bilan muzokaralarda u ko‘targan asosiy masalalar kelishuv matnida tegishli tarzda aks ettirilgan.
Men uchun eng muhimi, biz qarzdor emasmiz, kelishuvda na 500 milliard, na 350 milliard, na 100 milliard qarz haqida gap ketgan. Bu bizga nisbatan adolatsizlik bo‘lardi, dedi Zelenskiy.
U, shuningdek, kelishuvda xavfsizlik kafolatlari Ukraina xohlaganidek ko‘rinishda yozilmaganini, ammo ular tilga olinganini aytdi.
U yerda Ukraina istagan barcha xavfsizlik kafolatlari yo‘q, lekin men u yerda hech bo‘lmaganda kafolatlar haqida taklif bo‘lishini xohlardim va u doiraviy kelishuvda 10-bandida mavjud, dedi Ukraina prezidenti.
Bir kun oldin ommaviy axborot vositalari Ukraina vakillari AQSH prezidenti Donald Tramp ma’muriyati bilan tabiiy resurslar bo‘yicha kelishuv shartlarini kelishib olganini xabar qilgan edi. Financial Times ma’lumotlariga ko‘ra, AQSH Ukraina tabiiy resurslardan foydalanishdan 500 milliard dollar potensial daromad olish talabidan voz kechganidan so‘ng, Kiyev mineral resurslarini, jumladan neft va gazni birgalikda o‘zlashtirish bo‘yicha kelishuvni imzolashga rozi bo‘lgan.
Financial Times tanishib chiqqan 2025-yil 24-fevraldagi hujjatga ko‘ra, kelishuvda quyidagilar aks etgan:
- Ukrainaga tegishli foydali qazilmalar, jumladan neft, gaz va ularni qazib olish bilan bog‘liq infratuzilmani kelajakda monetizatsiya qilishdan olingan daromadlarning 50 foizini o‘tkazadigan jamg‘arma tashkil etish;
- Ushbu jamg‘arma mablag‘lari Ukrainaning o‘zidagi investitsiya loyihalariga yo‘naltiriladi;
- AQSHning jamg‘armadagi ulushi qancha bo‘lishi va resurslarga “birgalikda egalik qilish” shartlari hali noaniq.
Kelishuvga allaqachon Ukraina hukumati byudjetini to‘ldirayotgan mineral resurslar kirmaydi, ya’ni u Ukrainadagi eng yirik gaz va neft ishlab chiqaruvchilari bo‘lgan “Naftogaz” yoki “Ukrnaft”ning joriy faoliyatini qamrab olmaydi.
Ukraina rasmiylarining aytishicha, kelishuv adliya, iqtisodiyot va tashqi ishlar vazirlari tomonidan ma’qullangan. Shuningdek, prezident Vladimir Zelenskiy yaqin haftalarda Tramp bilan hujjat imzolash marosimi uchun Oq uyga tashrif buyurishi kutilmoqda.
Izoh (0)