АҚШ президенти Дональд Трамп Украинага Россияга қарши мудофаа урушига ёрдам бериш учун сарфланган “миллиардлаб долларлар”ни қайтариб олишни режалаштирмоқда.
Мен Украина томони бизга сарфлаган маблағларимиз эвазига бирор нарса беришини хоҳлайман. Шу сабабли биз нодир ер элементлари ва нефтни, қўлимиздан келган барча нарсани сўраяпмиз, деди у.
Мерилендда бўлиб ўтган Консерватив сиёсий ҳаракатлар конференциясида (CPAC) сўзга чиққан Трамп Европа давлатлари Украинага кредит кўринишида ёрдам берганини, Қўшма Штатлар эса бундай қилмаганини, шунинг учун уларга маълум миқдорда компенсация тўланиши кераклигини таъкидлади.
Биз ўз маблағларимизни қайтариб олмоқчимиз, бу шунчаки адолатсизлик, деди АҚШ раҳбари.
Унинг фикрича, Вашингтон ва Киев фойдали қазилмалар бўйича “келишувга эришишга жуда яқин”.
Биз келишувга эришишга яқинроқ бўлишимиз керак, чунки бу жуда оғир вазият, дея қўшимча қилди Трамп.
ОАВ: Зеленский ҳозирча АҚШ билан шартнома имзолашга тайёр эмас
Sky News телеканали президент Владимир Зеленский мамлакатнинг нодир ер элементлари конларини ўзлаштириш ҳуқуқини АҚШга бериш тўғрисидаги битимни ҳозирги кўринишида имзолашга тайёр эмаслиги ҳақида хабар берганди.
Келишув ҳали имзолашга тайёр эмас, бир қатор муаммоли масалалар бор ва лойиҳанинг ҳозирги кўринишида президент уни қабул қилишга тайёр эмас. Бугунги кундаги лойиҳалар келишувдаги шерикликни акс эттирмайди ва фақат Украинанинг бир томонлама мажбуриятларини ўз ичига олади, деди украиналик манба.
АҚШ миллий хавфсизлик бўйича маслаҳатчиси Майк Уолц эса келишув амалга ошишини айтди.
Асосий хулоса шуки, президент Зеленский бу битимни имзолайди ва сиз буни жуда яқин келажакда кўрасиз, деди у Мериленд штатида ўтказилган конференцияда.
АҚШ музокарачилари Украина келишувга рози бўлмаган тақдирда, унинг Илон Маскнинг ҳаётий муҳим Starlink сунъий йўлдош интернет тизимига киришини чеклаш имкониятини кўтаргани тахмин қилинмоқда.
The New York Timesънинг ёзишича, Украина Қўшма Штатлардан шартноманинг янги вариантини олган, бироқ ундаги баъзи шартлар 14 февраль куни АҚШ молия вазири Скотт Бессент томонидан Киевга олиб келинган аввалги вариантдан ҳам қаттиқроқ бўлган.
Украина томони ҳозирча таклиф қилинган шартлар асосида келишувга рози бўлиши ёки бўлмаслигини айтгани йўқ. Олий Рада спикери Руслан Стефанчукнинг маълум қилишича, ҳукумат даражасидаги гуруҳ 24 февралда келишув устида ишлашни бошлайди ва Украина Вашингтонга ўз ресурсларига кириш имкониятини бериш эвазига аниқ хавфсизлик кафолатларини олишни истайди.
Изоҳ (0)