Coindesk маълумотларига кўра, 25 февраль куни биткоин нархи 5,5 фоизга пасайиб, 88 минг 800 долларга етди. Бу ноябрь ойи ўрталаридан бери кузатилган энг паст кўрсаткичдир. Сўнгги бир ой ичида дунёдаги энг машҳур криптовалюта 11,4 фоизга арзонлашди. Қуйидаги бунинг сабабларини кўриб чиқамиз.
Экспертлар курснинг пасайишини бир қатор омиллар билан боғламоқда:
АҚШ макроиқтисодий сиёсати
АҚШ президенти Дональд Трамп томонидан 2025 йил февраль ойида импорт тарифларининг жорий этилиши инфляция босимининг кучайиши ва Федерал захира тизими томонидан фоиз ставкаларининг ошиши мумкинлиги ҳақидаги хавотирларни келтириб чиқарди. Бу эса инвесторларнинг рискли активларга, жумладан, криптовалютага бўлган қизиқишини пасайтирди.
Bybit крипто биржасига бузиб кириш:
Яқинда Bybit биржасига қилинган хакерлик ҳужуми оқибатида тахминан 1,5 миллиард доллар миқдоридаги криптовалюта ўғирлангани инвесторларнинг рақамли активлар хавфсизлигига бўлган ишончини сусайтирди.
Libra мемкоини можароси:
Капитализациянинг 4,5 миллиард долларгача кескин ўсишидан сўнг Либра мемкоини қиймати 95 фоизга тушиб кетди, бу эса инвесторларнинг янги криптоактивларнинг барқарорлиги ва ишончлилиги борасидаги хавотирларини кучайтирди.
Айни пайтда биткоин 86-89 минг доллар оралиғида ўзгаришда давом этмоқда.
Охирги ойлардаги биткоин курси динамикаси
2024 йил ноябрь. Биткоин 97 минг доллардан ошиб, рекорд даражага етди. Бу ўсиш Трамп маъмуриятининг криптовалюта сиёсати ва Федерал захира тизимининг фоиз ставкаларини пасайтириши билан боғлиқ бўлиб, инвесторларнинг рискли активларга бўлган қизиқишини оширди.
2024 йил декабрь. Ноябрь ойида энг юқори чўққига эришгандан сўнг, биткоин нархи тушишни бошлади ва декабрь ойи охирига келиб 91 минг доллардан пастга тушди. Бу пасайиш инвесторларнинг фойда олиши ва байрамлар даврида савдо фаоллигининг мавсумий пасайиши билан боғлиқ бўлди.
2025 йил январь. Йил бошида биткоин яна ўсиб, 100 минг доллар чегарасидан ошди. Бунга йирик корпорацияларнинг биткоин харидлари, жумладан, MicroStrategy компаниясининг қўшимча 1 минг 20 БТC сотиб олгани ҳақидаги маълумотлар сабаб бўлди.
2025 йил февраль. Бир ой давомида биткоин макроиқтисодий ноаниқлик ва инвесторларнинг криптовалюта бозорига бўлган ишончини сусайтирувчи воқеалар таъсирида 90 минг доллардан пастга тушиб, беқарорлик кўрсатди.
Изоҳ (0)