Украина президенти Владимир Зеленский фойдали қазилмаларни қазиб олиш бўйича АҚШ билан келишув имзолашга рози эмас, чунки келишув лойиҳасида “бир қатор муаммоли масалалар” бор. Бу ҳақда музокаралар жараёнидан хабардор манбага таяниб, Sky News хабар берди.
Келишув ҳали имзолашга тайёр эмас, бир қатор муаммоли масалалар бор ва лойиҳанинг ҳозирги кўринишида президент уни қабул қилишга тайёр эмас. Бугунги кундаги лойиҳалар келишувдаги шерикликни акс эттирмайди ва фақат Украинанинг бир томонлама мажбуриятларини ўз ичига олади, деди украиналик манба.
АҚШ миллий хавфсизлик бўйича маслаҳатчиси Майк Уолц эса келишув амалга ошишини айтди.
Асосий хулоса шуки, президент Зеленский бу битимни имзолайди ва сиз буни жуда яқин келажакда кўрасиз, деди у Мериленд штатида ўтказилган конференцияда.
АҚШ музокарачилари Украина келишувга рози бўлмаган тақдирда, унинг Илон Маскнинг ҳаётий муҳим Starlink сунъий йўлдош интернет тизимига киришини чеклаш имкониятини кўтаргани тахмин қилинмоқда.
11 февраль куни АҚШ президенти ҳарбий ёрдам эвазига Украина АҚШга ўз ҳудудида қимматбаҳо минералларни қазиб олишга рухсат беришга “деярли рози бўлганини” айтган эди. 15 февраль куни Трамп маъмурияти Украинага мамлакатнинг нодир ерости бойликларига эгалик ҳуқуқининг 50 фоизини АҚШга беришни таклиф қилгани маълум бўлди.
Аммо Зеленский ҳужжатни имзолашдан бош тортди. Эндиликда АҚШ Украинага фойдали қазилмалар бўйича битимнинг янги версиясини топширди. Украина раҳбари маслаҳатчилари президентдан уни имзолашни, Трамп билан “янги келишмовчиликка бормаслик”ни тавсия қилганди.
Ғарбга Украинада фойдали қазилмаларни қазиб олиш ҳуқуқини бериш ҳақида Зеленский 2024 йил кузида АҚШ президентлигига ўша пайтдаги номзодлар Дональд Трамп ва Камала Ҳаррисга тақдим этган “ғалаба режаси”да ҳам айтилган.
3 февраль куни Трамп бу вариант ҳақида яна гапира бошлади, бу Ғарб сиёсатчилари ва оммавий ахборот воситаларида катта шов-шувга сабаб бўлди. 7 февраль куни Зеленский Reuters агентлигига берган интервьюсида АҚШ Украина табиий ресурсларини ўзлаштиришда устуворликка эга бўлишини, чунки “америкаликлар ҳаммадан кўпроқ ёрдам берганини” айтди.
Изоҳ (0)