АҚШ президентининг миллий хавфсизлик бўйича маслаҳатчиси Майк Уолц Fox News телеканали эфирида Қўшма Штатлар Россия билан ўзаро муносабатларга янгича ёндашувни шакллантираётганини билдирди.
Биз Россия билан муносабатларимизни қайта кўриб чиқмоқдамиз. Биринчи қадам президент Трампнинг Путин ва Зеленский билан суҳбатлари, кейинчалик эса Ар-Риёдда бўлиб ўтган музокаралар бўлди, деди у.
Уолцнинг қўшимча қилишича, Қўшма Штатлар, шунингдек, “Америка халқи мамлакатга киритилган улкан сармоялардан фойда олиши” учун иқтисодиёт ва муҳим минераллар бўйича Украина билан ҳамкорликни қандай йўлга қўйишини янгича талқин қилмоқда.
Жорий йилнинг 18 февраль куни Ар-Риёдда Россия ва АҚШ делегацияларининг учрашуви бўлиб ўтган эди. Унинг якунлари бўйича Россия президенти матбуот котиби Дмитрий Песков музокараларда муносабатларни тиклаш йўлида муҳим қадам қўйилганини маълум қилди. Шу билан бирга, у икки давлат ўртасидаги муносабатларни нормаллаштириш учун узоқ йўлни босиб ўтиш кераклигини таъкидлади.
АҚШ Давлат департаменти ҳам мустаҳкам тинчликка эришиш учун биргина учрашув етарли эмаслигини қайд этди.
Аввалроқ АҚШ Россияни тажовузкор уруш учун қораловчи Украинанинг БМТдаги резолюциясини тўхтатишга ҳаракат қилаётгани ҳақида хабар берилган эди.
Шу билан бирга, АҚШ президенти Дональд Трамп маъмурияти БМТнинг барча аъзоларини резолюциянинг Америка матнини қўллаб-қувватлашга чақирди.
Қўшма Штатлар БМТга тинчликка эришиш йўлини белгилаш учун барча аъзо давлатларни қўллаб-қувватлашга ундайдиган оддий тарихий резолюцияни таклиф этди, дея АҚШ Давлат департаменти маълум қилди.
Таъкидланишича, ушбу резолюция президент Трампнинг БМТ ўзининг Низомида мустаҳкамланган асосий мақсадига — халқаро тинчлик ва хавфсизликни, жумладан, низоларни тинч йўл билан ҳал этиш орқали таъминлашга қайтиши кераклиги ҳақидаги фикрига мувофиқдир.
Биз қатъий ишонамизки, ҳозир урушни тўхтатиш бўйича мажбуриятларни зиммага олиш вақти келди. Бу тинчликка эришиш учун ҳақиқий туртки яратиш имкониятимиздир, дейилади баёнотда.
АҚШ резолюцияси лойиҳасида Украина суверенитети тамойилларига ҳаволалар йўқ
Bloomberg’га кўра, Америка резолюция лойиҳасида Украина суверенитети ва ҳудудий яхлитлиги тамойилларига ҳаволалар мавжуд эмас. The Washington Post хабарига кўра, Украинага Америка томонининг таклифи ҳақида 21 февраль куни хабар берилган.
Нашр суҳбатдошининг аниқлаштиришича, дастлаб Вашингтон Украина томонидан таклиф қилинган резолюцияни кўриб чиққан ва “уни юмшатиш учун баъзи ўзгартиришлар киритишни талаб қилган”. Кейин Вашингтон янги резолюцияни таклиф қилиб, Киевни ўз вариантини қайтариб олишга чақирган. Украина президенти Владимир Зеленский эса Украина ТИВга резолюцияни қайтариб олмасликни буюрган.
Россия АҚШ ҳужжатига тузатиш киритилган тақдирда, уни қўллаб-қувватлашга тайёр
AFP агентлигининг маълумотларига кўра, АҚШ томонидан илгари сурилган лойиҳада Украинанинг Россия томонидан босиб олинган ҳудуди ҳақида ҳеч қандай эслатма йўқ. Вашингтон томонидан илгари сурилган ва қўллаб-қувватланган аввалги резолюциялардан фарқли ўлароқ, сўнгги лойиҳада Москвага нисбатан танқид мавжуд эмас ва у можаро манбаи сифатида кўрсатилмаган.
Россия “можарога тезроқ барҳам беришга чақиради” сўзларидан кейин “шу жумладан, унинг асосий сабабларини бартараф этиш орқали” иборасини қўшиб, ҳужжатга тузатиш киритишни таклиф қилди, деб таъкидлади Reuters.
Россиянинг БМТдаги доимий вакили Василий Небензя эса Америка лойиҳасини “яхши қадам” деб атади. Россиялик аноним дипломатга кўра, агар бу тузатиш БМТ Бош aссамблеяси томонидан қабул қилинса, Москва АҚШ резолюцияси учун овоз беради.
Изоҳ (0)