Шимолий Корея АҚШ ва Жанубий Корея ўртасидаги ҳарбий ҳамкорликка қарши туриш учун “стратегик воситалар”дан фойдаланиш билан таҳдид қилиб, ядровий кучларни кўпайтириш бўйича саъй-ҳаракатларини икки баравар оширди. Бу ҳақда Newsweek хабар бермоқда.
Нашрнинг қайд этишича, Пхеньян чекланган миқдордаги қитъалараро баллистик ракеталарга эга бўлиб, улар бутун Шимолий Америка бўйлаб нишонларга зарба беришга қодир деб ҳисобланади. АҚШ ҳарбий-ҳаво кучларининг юқори мартабали вакили ушбу турдаги ҳар қандай ҳужум нохуш оқибатларга олиб келиши ҳақида огоҳлантирган.
Шимолий Корея Мудофаа вазирлиги ахборот бошқармаси баёнотига кўра, АҚШ президенти Дональд Трамп маъмурияти аллақачон “КХДР хавфсизлигига таҳдид солувчи АҚШ провокацияларини фаоллаштирган”.
Хабарда таъкидланишича, ядровий тийиб туришга асосланган КХДР қуролли кучларининг жанговар қобилиятини ошириш “АҚШ ва бошқа душманларнинг стратегик таҳдидига стратегик воситалар билан қарши туриш” учун адолатли ҳамда муқаррар вариантдир.
Февраль ойи бошида Япониянинг NHK телерадиокомпанияси Шимолий Корея жорий йилда Россия билан ҳамкорликда ишлаб чиқилган дронларни яратишни режалаштираётгани ҳақида хабар берган эди.
Нашр суҳбатдошларининг айтишича, мамлакатлар келишувга эришган, унга кўра, КХДР оммавий ишлаб чиқариш учун бир неча турдаги дронларни яратиш мақсадида Россиядан техник ёрдам олади.
Шунингдек, манбаларнинг таъкидлашича, келишув Шимолий Корея аскарларини Украинага қарши ҳужумларида Россияга ёрдам бериш мақсадида юбориш эвазига тузилган. Шу билан бирга, суҳбатдошлар Россия КХДРга ядро қуролини ишлаб чиқишда ёрдам беришни истамаслигини қайд этган.
Россия ва КХДР ҳамкорлиги
Россия ва Шимолий Корея уруш бошланганидан кейин ҳарбий соҳадаги ҳамкорликни кучайтира бошлади. 2024 йил июнь ойида Россия президенти Владимир Путин Шимолий Кореяга ташриф буюриб, Ким Чен Ин билан ҳужум содир бўлган тақдирда бир-бирини қўллаб-қувватлашни назарда тутувчи, шунингдек, Ғарб санкцияларига қарши ҳамкорликни ўз ичига олган кенг қамровли стратегик шартнома имзолаганди.
Украина армияси Курск вилоятида шимолий кореялик икки аскарни асирга олган. Президент Владимир Зеленский 12 январь куни улар сўроққа тутилгани акс этган видеони эълон қилди. Сўроқ пайтида КХДР аскарлари қаердалигини билмаслиги, уларга бу фақат ўқув машғулоти деб айтилганини таъкидлаган.
Изоҳ (0)