Америкалик сенатор Берни Сандерс АҚШнинг Исроилга миллиардлаб долларлик қурол етказиб беришини тўхтатишга уринмоқда, деб ёзмоқда Anadolu.
Сенат веб-сайтида эълон қилинган баёнотда Сандерс бош вазир Биньямин Нетаньяхунинг “экстремистик ҳукумати” бутун Фаластин халқига қарши “тўлиқ уруш” бошлаганини таъкидлади. Шу муносабат билан у Сенатга янги қурол-яроғ етказиб беришни маъқулламасликка чақирувчи қарорни тақдим этди.
Унинг айтишича, Нетаньяху Ғазо секторидаги биноларнинг қарийб 70 фоизини вайрон қилиш учун Америка бомбаларидан фойдаланмоқда.
Трамп ва Netaняҳу миллионлаб фаластинликларни кўчириш, яъни этник тозалаш ҳақида очиқчасига гапираётган бир пайтда, Исроилга кўплаб тинч аҳолини ўлдириш ва Ғазони яшаш учун яроқсиз ҳолга келтиришда ишлатиладиган бомба ва қуролларни бериш виждонсизлик бўлади, дейди сенатор.
АҚШ Исроилга 2000 фунтлик бомбалар юборди
9 ойлик танаффусдан кейин АҚШдан Исроилга 2000 фунтлик МК-84 бомбалар партияси етиб келди. Америка президенти Дональд Трамп собиқ етакчи Жо Байденнинг 2024 йил майидан буён амалда бўлган оғир қуроллар етказиб беришга қўйган тақиқини бекор қилди.
Маълум қилинишича, 15 февраль куни кечаси оғир авиабомбалар ортилган кема Ашдод портига етиб келган. Ўқ-дорилар тезда туширилиб, ҳаво кучлари базаларига етказилган. Исроил Мудофаа вазирлигининг хабарига кўра, юк ўнлаб юк машиналарида ташилган, логистика ишлари эса исроиллик ва америкалик мутахассислар ҳамкорлигида амалга оширилган.
Вазирлик маълумотларига кўра, уруш бошланганидан бери Исроилга жами 76 минг тоннадан ортиқ ҳарбий техника етказиб берилган. Бу мамлакат тарихидаги энг йирик ҳаво ва денгиз орқали қурол-яроғ етказиб бериш операцияси бўлди.
Исроил мудофаа вазири Исроил Кац Трамп маъмуриятига қўллаб-қувватлагани учун миннатдорчилик билдирди.
Бугун тунда Исроилга етиб келган ва Трамп маъмурияти томонидан рухсат берилган ўқ-дорилар етказиб берилиши бизнинг ҳарбий-ҳаво кучларимиз ва армиямиз учун сезиларли кучайишдир. Бу, шунингдек, Исроил ҳамда Қўшма Штатлар ўртасидаги мустаҳкам иттифоқнинг яна бир далилидир, деди Кац.
Изоҳ (0)