АҚШ президенти Дональд Трамп Россия ва Украина президентлари мамлакатлар ўртасидаги зиддиятни ҳал қилиш учун учрашиши кераклигини айтди. У, шунингдек, жангларни тугатиш истагини яна бир бор таъкидлади.
“Ўйлайманки, президент Путин ва президент Зеленский учрашиши керак... Мен ўт очишни тўхтатишни ва келишувни кўришни хоҳлайман”, деди Дональд Трамп матбуот анжуманида. Унинг гаплари Fox News томонидан эфирга узатилган.
Дональд Трамп Владимир Путин билан телефон суҳбатлари Владимир Зеленскийга қараганда яхшироқ ўтганини айтди. Шунингдек, у аввалроқ Россия—Украина можаросини ҳал қилиш бўйича музокараларда Украина президентининг иштирок этиши шарт эмаслигини айтганди.
20 февраль куни Владимир Зеленский Киевда АҚШ президентининг Украина ва Россия масалалари бўйича махсус вакили Кит Келлог билан учрашди.
Украина президентнинг айтишича, улар “кўплаб тафсилотларни ўз ичига олган яхши суҳбат” ўтказган. Томонлар жанг майдонидаги вазият, асирларни қайтариш ва хавфсизлик кафолатлари ҳақида батафсил фикр алмашган. Украина президенти Трамп билан “чиндан ҳам фойдали” келишув тузишга тайёрлигини маълум қилган.
“Украина ушбу урушнинг дастлабки сониялариданоқ тинчликка интилмоқда ва биз тинчликни ишончли ҳамда узоқ муддатли қилишимиз мумкин ва шундай қилишимиз керак, токи Россия қайтиб уруш бошлай олмасин. Украина АҚШ президенти билан инвестициялар ва хавфсизлик бўйича кучли, ҳақиқатда фойдали келишувга тайёрдир. Биз натижаларга эришишнинг энг тез ва конструктив усулини таклиф қилдик. Бизнинг жамоамиз 24/7 ишлашга тайёр”, дейди Зеленский.
Изоҳ (0)