Сирдарё вилояти Сайхунобод туманида 10 минг доллар эвазига АҚШ визасини олиб бермоқчи бўлган шахс ушланди.
У Бош прокуратура ҳузуридаги Иқтисодий жиноятларга қарши курашиш департаментининг Сайхунобод тумани бўлими томонидан ўтказилган тезкор тадбирда қўлга тушган.
Маълум бўлишича, фуқаро I.Р. фуқаро Ш.Х.нинг ишончига кириб, унга танишлари ёрдамида 10 минг доллар эвазига АҚШга бориши учун талабалик визасини олиб беришини айтиб, шундан 5 минг доллар ва 26 млн сўм пулни олган вақтида ашёвий далиллар билан ушланган.
Ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилган. Ҳозирда тергов ҳаракатлари ўтказилмоқда.
АҚШга ноқонуний бориш
Ўзбекистондан АҚШга ноқонуний бориш билан боғлиқ фирибгарлик ҳолатлари ҳақида хабар берилишига қарамай, бундай ҳолатлар тез-тез қайд этилмоқда. Хусусан, 2024 йил февралида АҚШга алдов йўли билан юбормоқчи бўлган етти киши ушланди. Апрель ойида Ўзбекистоннинг тўрт ҳудудида АҚШга ноқонуний йўллар билан юборишни ваъда қилган яна бир неча шахслар ушланди. Улар бу мақсадда 14—19 минг доллар атрофида пул талаб қилган.
АҚШнинг Ўзбекистондаги элчихонаси ноқонуний миграция хавфли ва серхаражат уриниш эканини билдириб, Ўзбекистон фуқароларини одамларни товар сифатида кўрадиган жиноий гуруҳлар ёлғон ваъдаларига ишониб, жабрдийда бўлишдан огоҳлантирган.
2024 йилда АҚШ ҳукумати 572 ўзбекни депортация қилган. Бу ундан аввалги йилга нисбатан 6,5 баравар кўп. 2013 йилда 88 киши, 2022 ва 2021 йилларда эса депортация қилинган ўзбекистонликлар сони мос равишда 21 ва 55 кишини ташкил қилган.
Изоҳ (0)