ДХХ Самарқанд вилояти бошқармаси ҳамда Иқтисодий жиноятларга қарши курашиш департаменти вилоят бошқармаси ходимлари ҳамкорлигида ўтказилган тезкор тадбирда фуқароларни АҚШга ноқонуний юбориш ҳолатига чек қўйилди.
Маълум қилинишича, Самарқанд туманида яшовчи 36 ёшли Н.Ф. маҳаллий фуқарони 16 минг АҚШ доллари эвазига Тошкент—Истанбул—Мадрид—Мексика—АҚШ йўналиши орқали АҚШга ноқонуний ўтказиб қўйишни ваъда қилиб, сўралган пулдан 10 минг долларни олаётган вақтда қўлга олинган.
Ушбу йўналишдаги яна бир шундай тадбирда Самарқанд туманида яшовчи фуқаро 62 ёшли Р.М. маҳаллий фуқарони Тошкент—Тель-Авив йўналиши орқали Исроилга жўнатиб, у ерда ишга жойлаштириш эвазига 18 минг доллар талаб қилиб, 12 минг долларни олаётган вақтида қўлга олинган.
Ҳозирда ушбу шахсларга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
АҚШга юбориш ҳолатлари
Март бошларида Самарқанд шаҳрида 64 нафар фуқарони АҚШга юборишини айтиб, уларнинг 4 миллиард сўмини ўзлаштирганларга суд ҳукми ўқилганди. Шунингдек, Самарқандда Мексика орқали АҚШга юборишини айтиб, фуқародан 50 минг доллар сўраган шахс ушлангани, Самарқандда фуқарони 30 минг долларга АҚШга юбормоқчи бўлган ҳайдовчи қўлга олингани, Навоийда фуқарони АҚШга ишга юборишини айтиб, 800 доллар олган шахс ушлангани тўғрисида хабар берилганди.
Изоҳ (0)