Самарқандда пул эвазига АҚШга юборишни ваъда қилган яна бир киши ушланди

Самарқанд вилоятининг Оқдарё туманида фуқарони пул эвазига АҚШга жўнатишни ваъда қилган шахс ушланди. Бу ҳақда Бош прокуратура ҳузуридаги департамент хабар берди.

Маълум бўлишича, Ж.Т. фуқаро Ш.А.нинг ишончига кириб, уни 16 минг АҚШ доллари эвазига Туркия ва Мексика орқали АҚШга юбориш учун виза ҳужжатларини расмийлаштириб беришни ваъда қилган.

Департаментнинг Оқдарё туман бўлими томонидан ДХХ ходимлари билан ҳамкорликда ўтказилган тезкор тадбирда у олдиндан 7 500 АҚШ долларини олган вақтида ашёвий далиллар билан ушланган.

Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.

11 сентябрь куни Самарқандда 14 минг доллар эвазига Самарқанд—Истанбул—Мадрид—Никарагуа йўналиши билан АҚШга ишга жўнатишни ваъда қилган шахс қўлга олингани хабар қилинганди. Июнь ойининг ўрталарида Самарқандда икки кишини АҚШга юбориш учун 40 минг доллар олган шахс ушланганди. Май ойида эса шундай ноқонуний йўллар билан АҚШга юбориш учун 30 минг доллар олган шахс қўлга олинганди.