UFC’нинг икки вазн тоифаси собиқ чемпиони Конор Макгрегор 2025 йил ноябрь ойида бўлиб ўтадиган Ирландия президентлик сайловида ўз номзодини қўйиши мумкин. Спортчи бу борада ижтимоий тармоқлардаги саҳифаси орқали халққа мурожаат қилиб, уларни ўзини қўллаб-қувватлашга чақирди.
Макгрегор ўз баёнотида мамлакатга содиқлигини таъкидлаб, молиявий ҳолати сабабли унга босим ўтказиш ёки уни пул билан сотиб олишнинг иложи йўқлигини айтди:
Менинг чексиз бойлигим, меросим ва умуман барча нарсам Ирландияда. Бу шуни англатадики, мени пул билан сотиб олишнинг имкони йўқ. Мен порахўр эмасман. Террорчилар билан ҳеч қандай алоқам йўқ ва доимий босимларга бардош бера оламан, — деди Макгрегор.
Шунингдек, у ўзини мамлакатдаги муаммоларга ечим сифатида кўраётганини билдирган:
Агар сиз мени президент этиб сайласангиз, бу Ирландия учун энг тўғри қарор бўлади. Мен — барча муаммоларнинг давосиман. Кимдир мени тўхтатмоқчи бўлса, билсин: мен сиз ўйлаганингиздан ҳам кучлиман. Атрофимда кучли жамоа жамланган. Мен бу пойгада қатнашаман ва ғалаба қозонишга ҳаракат қиламан. Фақат бир илтимосим бор, Конор Макгрегорга овоз беринг.
Макгрегор 2025 йил 17 март куни АҚШ президенти Дональд Трамп билан Оқ уйда учрашган. Бу учрашув унинг сиёсатга жиддий киришаётганининг ишораси сифатида баҳоланмоқда.
Маълумот ўрнида, 37 ёшли Конор Макгрегор профессионал фаолияти давомида 22 та жанг ўтказиб, 16 та ғалаба ва 6 та мағлубият қайд этган. У UFC тарихида илк бор икки вазн тоифасида чемпионликни қўлга киритган спортчи сифатида ном қозонган.
Изоҳ (0)