Фарғона ва Жиззах вилоятларида фуқароларни ноқонуний йўллар билан хорижга ишга юборишни ваъда қилган шахслар қўлга олинди, деб хабар беради Бош прокуратура ҳузуридаги департамент.
Маълум қилинишича, департаментнинг Марғилон шаҳар бўлими томонидан терговга қадар текширув ўтказилган. Текширувда Ф.Т. исмли шахс фуқаролар Т.Х. ва М.Н.ни Мексика давлати орқали АҚШга ишга юборишлари эвазига улардан жами 24 минг долларни фирибгарлик йўли билан қўлга киритгани аниқланган.
Шунингдек, департамент ҳамда ДХХнинг Жиззах вилояти бошқармалари томонидан ўтказилган тезкор тадбирда Ш.Э. исмли шахс фуқаро Д.Ш.ни Туркия давлати орқали Англияга мавсумий ишга юбориш эвазига 2,5 минг долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 25, 168-моддаси (фирибгарлик) билан жиноят ишлари қўзғатилиб, тергов ҳаракатлари ўтказилмоқда.
Сентябрь бошида АҚШ президенти Жо Байден маъмурияти Ўзбекистондан АҚШга одамларни ноқонуний олиб киришга уринган жиноий тармоқни аниқлашга ва фаолиятини тўхтатишга муваффақ бўлгани маълум қилинган эди. 11 сентябрь куни Самарқандда 14 минг доллар эвазига Самарқанд—Истанбул—Мадрид—Никарагуа йўналиши билан АҚШга ишга жўнатишни ваъда қилган шахс қўлга олинганди.
Ноябрь охирларида АҚШ Ички хавфсизлик департаменти АҚШ—Мексика чегараси орқали Америкага киришга уринаётган фуқароларни чиқариб юбориш сиёсати бўйича ўзгартиришларни эълон қилганди.
Изоҳ (0)